شاركنا برأيك ..بعد ماخلعته عايز يرجعلي تاني ..هل ارجع له ؟

خاص لموقع الحق والضلال

كتبت: نورهان عبدالله

عرضت احدى السيدات مشكلتها على احدى الحلقات التليفزيونية تقول :"

أنا واحدة ست عمري 35 سنة ومن أسرة مستواها المادي والاجتماعي كويس، بعد ما اتخرجت كنت مأجلة فكرة الجواز لفترة علشان أحقق ذاتي في الشغل وفعلا ركزت في الشغل لدرجة كبيرة والحمد لله وصلت لحاجة كويسة في شغلي، وطول الفترة ديه كان بيجيلي عرسان وأنا عمالة أرفض . ما كنتش حابة فكرة جواز الصالونات ومستنية الشخص اللي يحبني وأحبه ويبدو إن تفكيري ده كان غلط . المهم في يوم من الأيام اتعرفت على واحد من على النت وقعدنا نتكلم فترة كبيرة واتقابلنا وبدأت قصة حب انتهت بأنه اتقدملي وأهلي رفضوه لأنه أقل مننا اجتماعيا وماديا ومش بس كده لأ ده كان بيشتغل شغلانة عادية . وبصراحة أنا ساعتها مكنش فارق معايا لأني حبيته . المهم أصريت عليه وعارضت أهلي بشدة واتجوزته وهما مش موافقين، المهم بعد أقل من 6 شهور من جوازنا هو ساب الشغل وبقيت أنا اللي باشتغل واصرف على البيت . ومش بس كده ده أنا دفعت مقدم شقة من تحويشة شغلي وبدأت أدفع أقساطها من مرتبي، ولما خلصت الأقساط وجيت اسجل الشقة رفض اني اسجلها باسمي وقالي ان صعب عليه نفسيا انه يبقى عايش في شقة باسم مراته وبصراحة أنا ما اعترضتش . وتمر الأيام وتحصل بينا مشكلة كبيرة بسبب أهله اللي فعلا طلعوا مش من مستوانا ومن بيئة مختلفة تماما عننا واتطورت المشاكل لحد ما انتهت للأسف بالانفصال وقام طاردني أنا وولادي من شقتي ورفض يديني أي حاجة من حقوقي، وياريت الأمور وصلت لحد كده لأ ده اتجوز واحدة تانية في شقتي اللي مكتوبة باسمه وبنفس العفش بتاعي . ووصلت الخلافات بينا للمحاكم وانتهت بأني رفعت عليه قضية خلع، وأول ما اتحددت جلسة النطق بالحكم لقيته بدأ يكلمني ويقولي أنه بيحبني وانه غلط وانه في مشاكل كبيرة مع مراته الثانية وأنه عايز يطلقها بس المشكلة في قيمة المؤخر بتاعها . قال ايه كاتب على نفسه مبلغ كبير ومش عارف يطلقها بسببه . وقعد يحلفلي انه بيحبني وعرف قيمتي بعد ما اتجوزها وانه عايزنا نرجع لبعض تاني . وبصراحة أنا ما كنتش مصدقاه وقلت هو بيعمل كده علشان خلاص هاخلعه لحد ما جه يوم طلب يقابلني . واتقابلنا . وبلغني انه طلقها بالفعل وطلعلي ورقة طلاقها من جيبه بس يا خسارة جابلي مع الورقة مصيبة تانية . قال ايه اضطر يبيع الشقة علشان يدفعلها المؤخر ومش باقي معاه الا مبلغ بسيط . وقال ايه بيقنعني انه يدفعه مقدم جديد لشقة جديدة ونبدأ من الصفر ووعدني انه هيشتغل ويغير من نفسه . أنا بجد مش مصدقة ومنهارة وأنا شايفة إني ضيعت عمري وشقايا راح على الفاضي ومش عارفة اعمل ايه خصوصا اني قاعدة بولادي في بيت أهلي ومش مبسوطة ومش قاعدة براحتي . المشكلة ان أهلي برضه رافضين رجوعي ليه للمرة الثانية وأنا اللي محتارة هل أرجعله وأعارضهم تاني وأبدأ حياتي من الصفر تاني ولا اخلعه ولا أتنازل عن القضية ولا أعمل ايه بجد محتاجة رأيكم لو كنتوا مكاني كنتوا عملتوا ايه ؟؟

ملحوظة:

لو عندك مشكله وعاوز تشارك معانا بيها ارسل لنا علي الإيميل ده

[email protected]