مراحل انهاء العلاقة الاربعة عند الانثى اللى واثقه من نفسها..ازاى تتخلصي من شريك حياتك

خاص لموقع الحق والضلال

كتبت: نورهان عبدالله

لو كنتي فعلاً تعبانة مع شريك حياتك أكيد مريتي بالمراحل دي لإنهاء العلاقة اللي بتسببلك التوتر وعشان كده صفحة your wedding planner" بتقدملك الخطوات دي يمكن تكوني صادفتي وحصلت معاكي .

دى بتحب بجد, وبتلتمس اعذار كتير, وبتطلع مبررات كتير لشريكها وبتقوله ربنا يكون فى عونك انا مقدرة وانا استحمل, بس المهم انك تنجح, بس مع الاسف ,
اوقات "بعض الاشخاص مش معظمهم" مبيفيهمش انها بتعاني جدا ,وتعبانه جدا, ومحتاجه اهتمامه جدا جدا, ف بدل ما يحاول يفضي نفسه ويظبط وقته
بالعكس بيسوق فيها على الاخر وكأن ده حق مكتسب وكأن ده فرض عليها, فبتقرر تنهي العلاقة بالشكل ده
- "لفت نظر" هو انا مبجيش على بالك خالص؟

دى المرحلة الاولى, اللى بتكون بداية احساسها بالخطر من ناحيته, وبدأت تركز معاك بشكل كبير, لدرجة انك بقيت شغلها الشاغل , اشهر الجمل فى المرحلة دى " ايه مشفتش تليفوني؟ واي رد منك, هى بترد عليه بجملة
ياسلام؟ المفروض انا اصدقك صح؟ وهي بتقول كده لانها تقريبا حفظت كل الحجج, فبطلت تتصل فى اى وقت وبقت تختار الاوقات اللى هو قايلها انه بيكون فاضي, او فى البيت, او اجازة, المهم انها بتكون سدت كل ابواب الحجج اللى ممكن تتقال, مش عايز اقولك انها بتتابع اخر ظهور ليك على الفيس بوك وعلى الوتس اب, ومش بعيد تكون كلمت اى حد قريب منك عشان تبقى عارفه ومتأكده ان مفيش حجه هتنفع معاها
ومبتقولش اى حاجه من ده كله, يعنى بتتصرف فى السكرتة.

- " التهديد الغير مباشر" انا زهقت وتعبت
اى كلام كان بيخليها تطير من الفرح, بتكون اكنها مسمعتوش, سكوت كتير وسط المكالمة, كلمة انا هقفل مبتهزهاش زى الاول, اشهر جملة على لسانها فى الفترة دى "انا زهقانه, انا تعبانه, بفكر انزل شغل, واي حاجه ممكن تزعله منها والمفروض انهم متفقين ان الموضوع منتهي فيها بتجيب سيرتها, المرحلة دى اغلب المكالمة بتنتهى بخناقات, وزعل ممكن ياخد يوم او اتنين وكتير ممكن يدخل فى اسبوع او اكتر

- "عادي" اللى هو طب كويس والله
بتكون عبارة عن لوح تلج, حتة طوبة, من الاخر يعنى جماد, عايز تقفل اقفل, عايز تكلم اتكلم, عايز تزعل براحتك, وبرضه المكالمة بتنهى بنخاقة بس المره دى منه مش منها, لانها بتكون "هااااااادية تلاجة"
رد فعلها الوحيد لالالا متزعقش وطى صوتك, طيب شكلك مصر عموما نقفل دلوقتى ولما تهدا نبقى نتكلم سلام, خد بقا عندك اسبوعين تلاته, شهر, ومش هى اللى بتتصل خالص

- "مع السلامة" اللى هو فاكرني هعيط وكده؟
دى بقا مرحلة عدم الرد على التليفونات من اول مره وتاني مره وتالت مره, ولو شافت اتصال منه, مبترجعش ترد الاتصال, ولما يسألها عن السبب تقوله اصلى كنت نايمة, اصلى كنت خارجه, اصلى كنت نازلة, اصلى صاحبتى كانت معايا ومعرفتش ارد, اى بوادر لصوت عالى بتقفل السكة على طول, مبتستناش, وبعد محاولات اتصال كتير منه, لو اتصل وزعق, بتقوله متتصلش بيا تاني, احنا مش هننفع لبعض.

‫#‏الخلاصه‬: الاهمال كفيل بقتل الانثى, وتغير شخصيتها من النقيض الى النقيض