شاب يدفع غرامة 15 جنيه بسبب قوانين المترو الجديدة
خاص لموقع الحق والضلال
كتبت: نورهان عبدالله
نشر احد الشباب تجربته على الفيس بوك والتي تعرض لها مع احد عمال المترو حينما اجبره على دفع مبلغ غرامة 15 جنيه نتيجة استخدام التذكرة ذهاب وعودة فيقول:"كنت راكب المترو دلوقت من محطة السيدة زينب رايح محطة الشهداء عشان أركب القطر.
المهم سرحت مع الموبايل لقيت نفسي في محطة غمرة اللي هي بعد الشهداء بمحطة واحدة.
عادي مفيش مشكلة حصلت معايا كتير ومع كل الناس المهم زي كل مرة رحت نازل ولفيت عشان أنزل على الرصيف المقابل عشان أرجع المحطة دي للشهداء. وإذ فجأةً يا مؤمن ألاقي إنسان -مواطن شريف- متعرفش طوله من عرضه من ارتفاعه ماسك عيل صغير حوالي ١٥ سنة وراجل كبير غلبان كده وجاي عليّ يمسك إيدي وبيقولي بطاقتك وتذكرتك.
فبسأله ليه ؟ قال عشان ممنوع تلف بالتذكرة
قلتله ممنوع ازاي ؟ قال صدر قرار إن التذكرة رحلة واحدة بس.
قلتله ماهو أنا فعلا بستخدمها في رحلة واحدة بس اللي هي من السيدة زينب للشهداء بس المحطة فاتتني فبرجعلها. قال بس إنت دلوقت في غمرة وممنوع تاخد الاتجاه العكسي لإن الرحلة الواحدة دي في القرار هي ذهاب فقط أو إياب فقط يعني تركب في اتجاه واحد بس لكن انت كده يعتبر بتركب اتجاهين بنفس التذكرة.
قلتله يا عم مين اللي قال الكلام ده ماهو احنا طول عمرنا بنستخدم التذكرة عادي في كل الاتجاهات مادمنا مطلعناش من المترو تبقى التذكرة شغالة. قاللي الكلام ده كان زمان ودلوقت طلع القرار إن الرحلة تبقى واحدة ذهاب بس أو عودة بس ولازم تدفع غرامة ١٥ ج فوري.
طبعا بما إن كلامه غير منطقي بالمرة فطلبت نروح مكتب الأمن وياريتني ما رحت. بقولهم كذا كذا راح المسؤل بتاعهم قاللي ياباشا انت مش بتقول إنك راكب من السيدة زينب للشهداء، يبقى نهاية تذكرتك الشهداء يبقى إنت كده لما رحت غمرة تخطيت حدود تذكرتك وكمان عاوز ترجع بيها تاني في الاتجاه العكسي !! (هو قال الكلام ده بطريقة استنكارية تحسسك إنه بيتكلم صح فعلا ). فقلتله الكلام ده لو أنا راكب قطر والتذكرة ليها محطة بداية ومحطة نهاية لكن المترو تذكرته موحدة مفهوش الكلام ده. فطبعا الناس اللي كانوا ممسوكين معايا وعندهم أمل فيّ شافوا إن ردي مقنع وابتسموا وقالوا للمسئول ده أيوه يا فندم كلام الأستاذ صح.
فطبعا الراجل الطيب مسئول مكتب الأمن مكدبش خبر وقال رد أقنعني أنا شخصيا وهو (خلاص يبقى تستنوا معانا ونعمل محضر والأستاذ يقول كلامه ده في النيابة) 😄😄
فطبعا لأني كان معاد القطر بتاعي قرب جدا وفي الأساس لإني فاقد الأمل تماما في البلد دي وفي إن ممكن أي حق يرجع لأي حد رحت ببساطة مصحوبة بابتسامة إديته ١٥ ج وأخدت الوصل ومشيت.
الجميل في الموضوع والجديد في نفس الوقت هو إني محستش طول الفترة دي إني متضايق خالص ولا مستغرب ولا متنرفز ولا أي مشاعر من المتوقعة دي خالص ولما دورت على السبب لقيت إن هو ده تمام البلد دي ونبقى غلطانين لو انتظرنا غير كده.
قولوا لأصحابكم بأه يخلوا بالهم إن فيه قانون جديد في المترو بيخلي الرحلة ذهاب بس أو إياب بس والغرامة ١٥ ج فوري بجانب المعاملة اللطيفة.
وصل الغرامة :
