شاب يحكي تجربته السيئة مع فراخ كنتاكي ..طلعت مش مستوية من جوه
خاص لموقع الحق والضلال
كتبت: نورهان عبدالله
يحكي شاب تجربته السيئة مع كنتاكي والتي نشرها على صفحة الفيس بوك خاصة بعد أن ذهب لأحد الفروع واكتشف أن الفراخ لم تكن مستوية من الداخل فيقول: "من أسوأ تجارب عمري في الأكل, (الموضوع طويل معلش)
النهاردة كنت في مدينة نصر وقولت اتغدى في بافالو وشاء القدر مالقيش ركنة واضطر امشي واطلع على حسن المأمون,
لقيت كنتاكي وللأسف طاوعت نفسي اني ادخل,
لقيت ساندوتش جديد وعاملين براندينج جامد ليه جوه الفرع قولت اجربه وطلبت معاه تويستر,
قعدت استنى الاوردر لمحت في الريسيت على التويستر إضافة جبنة وافتكرت ان نفس الموقف اتعمل من اخر مرة كنت في كنتاكي انهم يضيفوا على الاوردر جبنة وتحاسب عليها لكن واقعيا مش بتتحط في الساندوتش,
المهم ندهت على الويتر وقولتله راجع الريسيت مع البنت الكاشير علشان انا ماطلبتش اضافة جبنة راح ورجع قاللي الاوردر صح !
قولتله يعني لو كلمت الكول سنتر حيقولي الاوردر صح ؟ راح راجع للبنت تاني وانا فعلا كلمت الكول سنتر اشتكيت وقالولي فعلا ان البنت غلطانة,
شوية ولقيت مدير الفرع (وائل) جايلي بفرق الفلوس مع الريسيت وبيعتذر عن خطأ البنت !
المهم الاوردر جه وبدأت أكل اكتشفت ان الساندوتش عبارة عن قطعتين بانيه بينهم تركي ومايونيز ومن غير عيش !
قولت ماشي اجرب قطمة والتانية حسيت الاكل فيه قرقشة وطعم غريب,
إكتشفت ان الفراخ مستوية شكل وقشرة من برة بس والفراخ نية تماما من جوة ! طبعا إحساس القرف اللي كنت فيه كان بلا حدود انك بعد يوم شغل داخل تاكل في مكان يأكلوك فراخ نية بالمنظر اللي في الصور ديه !
طبعا صورت الساندوتش والريسيت وندهت الويتر تاني يجيب المدير اللي جالي بيقولي خير يافندم شاورتله عالساندوتش بمنظر الفراخ النية وقولتله انا مش عارف اقولك ايه!
قاللي وانا مش عارف اعتذرلك إزاي !
قاللي دقيقة واوردر تاني حيكون جاهز لحضرتك ! على اساس ان الوضع يسمح اني اكل من عندهم تاني !
شوية وجالي واحد من الستاف بإبتسامة من الودن للودن وبيقولي هو حضرتك متضايق مننا ليه بس !
قولتله انت بتتكلم جد انت شوفت الاكل ؟ قاللي اه مستر وائل وراهولي قولتله وجي تسألني !!
قاللي دقيقة والاوردر حيكون جاهز !
طبعا انا ماستحملتش استنى وخرجت من المكان مفيش خمس دقايق لقيت رقم بيتصل وواحد بيقولي استاذ رامي انت مشيت !
قولتله انت مين قاللي انا وائل مدير الفرع (جاب نمرتي من الكول سنتر)
قولتله بصراحة الموقف في منتهى القرف وانا اللي غلطان اني اكلت عندكم اصلا قعد يعتذر قولتله بصراحة انا مش عاوز اتكلم وقفلت معاه بكل ذوق
عشر دقائق ولقيت رقم تاني وواحد بيتكلم وبيقولي كنتاكي معاك يافندم قولتله اهلا يا كنتاكي افتكر اني حهزر ودخل بيهزر وبيعتذر انه غلطة مش مقصودة واتضح انه برضه واحد من الفرع !
قولتله هي نمرتي حتفضل تتنقل من واحد للتاني ؟! انا مش عاوز حد يتصل بيا تاني بعد إذنكم".
وأسيبكم مع الصور:
