عمرو أديب محمد بيه عمل شغل عالي قوي في المظاهرات

أشاد الإعلامي عمرو أديب، بمرور تظاهرات واحتفالات 25 إبريل عيد تحرير سيناء، على خير، دون وقوع كوارث أو ضحايا.

وقال خلال برنامجه "القاهرة اليوم" المعروض على فضائية "اليوم": "انهارده عدى على خير الحمد لله مفيش مشاكل ولا حد مات، ممكن تكون في إصابات بس كلها طفيفة، إحنا وطن واحد، أحب أن يكون بكل أطيافه وأطرافه بخير حتى لو في اختلاف لازم يعدي على خير".

وتابع "امبارح كان اختبار لجهتين الأولى ضد والثانية معًا، الأولى التحدي بتاعها كان القدرة على الحشد، يعني أكبر مسيرة للاخوان كانت في الشرقية وكان مشارك فيها 100 واحد بس، وبالتالي يبدوا إن الحركة على الأرض أصبحت غير موجودة تقريبًا، أما بالنسبة للمعارضة الوطنية فكان عددهم أقل من المرة السابقة، فلم يكتمل عددهم 2500 متظاهر في كافة انحاء الجمهورية، كما اختفت رموز المعارضة وهو ما أثر كثيرًا على التواجد".

وأضاف "كمان محمد بتاع قسم الهرم عمل شغل زي ما الكتاب ما بيقول، يعني ايده تتلف في حرير، مسابش حاجة في كتاب إزاي فشل مظاهرة إلا وعملها، ده لازم يتم تكريمه، اللي كاتب الخطة بتاعة اقفل الشارع والقبض على العيال من أول امبارح ومنع خروج المظاهرات من الأحزاب يعني تسلم ايده الدبلتين والأسورة، واشتغلت معركة القط والفار بين الداخلية والمتظاهرين، لكن محمد بيه عمل شغل عالي مفيش مظاهرة كملت 10 دقايق ولا مسيرة كملت أكتر من ربع ساعة، يعني مكنش في أي مظهر من مظاهر الاحتجاج، من الآخر محصلش جملة مفيدة".

واستطرد قائلًا "محمد بيه عمل حاجة غريبة النهاردة يعني محدش لاحظ وجود الأمن أو الجيش في شوارع القاهرة، يعني وجودهم مكنش واضح وقوي، إلا بالقرب من الاماكن اللي فيها تخوف زي نقابة الصحفيين، والطرف المعارض اللي اتهزم قالوا إن دي مجرد بداية، أما الطرف التاني بيعتمدوا على الشعب يريد".

نقلا عن الوفد