مريم سفرت السما
مريم سفرت السما
مريم كانت علي طول تقول انا هاعمل فرحي طقسي يعني هاعمله كنيسه بس و هايكون الصبح و مش بليل و هازوّق الكنيسه كلها ورد و هاروح خلوة في الدير الاول و فعلا فرح مريم علي عريسها السماوي كان الصبح وكنيسه بس والكنيسه كانت متزوقه بالورد كلها و كمان كان الصندوق كان ابيض جميل .
مريم لما خرجت من المستشفي اخر مرة اصّرت تروح علي الكنيسه اول حاجه قبل البيت تصلي وتسلم علي الاباء وتزور القديسين و تروّح بعدها علي البيت و فعلا ده حصل راحت بالعربيه علي المستشفي الاول و صليت و زارت وسلمت علي الاباء و روحت البيت و أما سافرت السما المرة اللي بعدها خرجت مريم من المستشفي الصندوق و راحت علي الكنيسة برضو ترتيب ربنا أنها في المرة الأولى تروح تسلم علي القديسين عشان يعرفنا انها في المرة التانيه أنها مع القديسين
كان في واحد اسمه شادي اتعرف علي مريم في المستشفي المرة اللي قبل الغيبوبه هو من نفس الكنيسه بس مكانش في تعامل بينهم خالص وكان حابب هو و مراته يروحو يسلمو عليها بس كانو شايلين هم انهم مايعرفوش حد خالص و مش عارفيين هايقولوا ايه لكن لما طلعوا و دخلو لمريم مريم رحبت بيهم جدا ورغم ان الزيارة كانت ممنوعه دخلتهم الاوضه و رحبت بيهم جدا و كانت تضحك و تهزر معاهم و قالتلهم نفسي اكل كبده من علي العربيه و وعدها شادي قالها ليكي عندي اعملك كبده زي بتاعت العربيه بالظبط بس في البيت و كان هو و مراته مبسوطين جدااااا فضلوا معاها بالساعات بعد ما كانوا متفقين انهم 10 دقايق و يمشوا و اشتكي شادي ان عنده سفر لمكان في السعوديه و كان خايف من العنصريه هناك لكنه كان سفر شغل و لازم يروحه و لما حكى لها علي موضوع السفر قالتله ماتقلقش وممكن السفر يتلغي او يتغير ان شاء الله صلي انت بس و فعلا في اليوم التالت من سفر مريم للسماء شادي اترفض من السفارة السعوديه و اترفض مرتين تاني من بعد المرة دي و المرة الأخيرة بدون أسباب و هم كانوا سايبين موضوع السفر ده علي مرمر 😊
من ترتيب ربنا انه كان يطول في عمرها علشان في كان بينها و بين ناس كتير اختلافات و زعل و ربنا رتب انهم يزروها و يصالحوا بعض في ايامها الاخيرة و مريم فرحت جدا بكده و كتبت عنه علي الفيسبوك ان الناس اللي بينها وبينهم زعل صالحتهم وصالحوها و أنها فرحانة جدا أن ربنا رتب أن مايكونش في بينها و بين اي حد زعل .
مريم ودعت كل حبايبها قبل ما تسافر بيوم وصادف ان كلنا حلمنا بيها قبل ماتسافر بيوم انها بقيت كويسه مع اختلاف تفاصيل الحلم بس كلنا متفقين انها كانت حلوة اوي و كويسه اوي في الحلم و ده من ترتيب ربنا الجميل 😊
مريم اخر قديس ندهتله كان ابو سيفين كان اخر كلمه قالتها هي "ياربي يسوع و يا ابو سيفين" بصرخة و ماتكلمتش بعدها تاني مدافن ابو مريم في القديسه برباره يوم سفرها السما باباها فتح المدفن علشان يجهزه علشان يدفن مريم فيه و يصادف ان سقف المدفن يقع ماتتدفنش هناك و تروح تدفن في مدافن اهل جوز اختها اللي هي في ابو سيفين اخر قديس ندهت عليه فعلا اتدفنت جنب آخر قديس ندهت عليه أبو سيفين شفيع العذارى اللي انا توقعت أن هو اللي ظهرلها أما قالت تعالوا خدوني بقي
واحد صاحبها كان متاخر علي ميعاد في الجيش و كانت المسافه ساعه الا ربع و كان متاخر كان هايتحبس راح قال يارب ساعدني اني اوصل بسرعه و افتكر مريم و قال يا مريم انتي كنتي علي طول تفكري فينا و تساعدينا وانتي تحت اهتمي بينا كمان و انتي فوق انتي اتحررتي من قيود الجسد ده و فعلا بيقول انه وصل المشوار اللي بياخده في ساعه الا ربع وصله في 10 دقايق و العداد بتاع التاكسي كان بيقفل 30 او 35 جنيه العداد وقتها عمل 17 جنيه و كان خايف من ان حد يشوفوه علي الباب و الاكيد ان لازم يكون حد واقف علي البوابه لكن وقتها محدش شافه و هو داخل و اول ما دخل من الباب جاتله رساله علي الموبيل ايه بتقول و انا ارسل لك ملاكك الحارس و بعدها العميد اللي كان شديد جدا كلمه و قاله تعالالي المكتب و قابله و رحب بيه .
بعد النياحة باسبوعين واحده من اصحاب مريم زارت اهلها في البيت و حكت معجزة حصلت معاها من قبل النياحه و هي ان البنت خلصت شغل وكانت عايزة تروح لمريم العنايه المركزة و باب عربيه الشغل بتاعها كان مخبوط من الجنب و مكانوش راضيين خالص قالوا عشان العربيه مخبوطه و عايزين نروح نصلحها و كده كانت متضايقه و فضلت تتحايل وبتقولهم بهزار طب ودوني و شوفوا مريم هاتعمل ايه و الكلام كان بهزار المهم وافقوا و قالوا هانوديكي و راحت و طلعت لمريم العنايه لمريم و نزلت بتعيط اوي من منظرها لما شافتها علشان عنيها كانت مربوطه و شكل الخرطوم و هو داخل من زورها و انتفاخ وشها و جسمها و الغيبوبه بعد ما نزلت شافت صحابها عمالين يضحكوا جامد قالتلهم علي فكرة انتوا معندكمش دم علشان هي تعبانه وانا عماله اعيط و انتوا بتضحكوا قالولها انتي ماتعرفيش احنا بنضحك علي ايه بصي الباب اتصلح و و رجع كأنه جديد قالتلهم ازاي قالوا منعرفش احنا دخلنا قعدنا في الريسيبشن خرجنا لاقينا المنظر ده فضلت هي تبث علي الباب و شكت في نفسها و بصيت علي الباب التاني و استغربت جدا بس المهم أن الباب اتصلح و رجع احلي من الجديد كمان .
🔴 حابب اقول حاجه مهمة اوي بالنسبالي أول حاجه انا بعتذر لمرمر جداااا اني ماقدرتش اوصف مدي عذابها و معاناتها بالمرض لاني مهما كتبت مش هقدر اوصف 10 % من اللي كنت بشوفه بس بتمنى أنها تكون انبسطت بالعمل ده و اني بردلها جزء بسيط جدا لا يذكر بشكرها بيه علي كل اللي عملته معايا مع اني مهما عملت طول حياتي مش هقدر أوفي أي حاجه خالص من اللي هي عملته معايا لأنه فعلا مايتوصفش بكلام مرمر بشكرك مع كل نفس داخل و خارج مني عمري ما هنساكي ولا لحظة مع اني مشتاق جدا جدا ترجعي عشان وحشتيني بس انتي فعلا مكانك السما أعظم مكان في الكون كله و ربنا يفرحك بأكاليلك 👑 و تكوني قديسة منورة في ملكوت ربنا كلام كتير اوي أوي جوايا لو خرجته مش هايكفي .
ناس تانيه حابب اعتذرلهم هم مرضي الكانسر اللي معانا علي البيدج أو اللي قروا قصة مرمر و عذابها حابب اقولهم ماتخافوش و ثقوا في ربنا ربنا حنين و ترتيبه احسن ترتيب و مش هايحصل معاكم كم العذاب اللي حصل مع مرمر لأنه مرض مرمر نوعه ورم أطفالي و بيظهر من سن 6 شهور ل 5 سنين بعد كده مستحيل يظهر و ده يوضح أن ربنا رتب أن النوع ده يظهرلها عشان هو عاوزها في ملكوته فوق مش عايزها معانا هنا هي مكانها فوق و أداها كمان علي اد احتمالها 3 سنين عذاب أداها الم و عذاب و مجد و علمها تشكر و تبشر بالسيد المسيح و تجيب ليه نفوس كمان عشان يمجدها معاه فوق في السما زي ما هي بتمجده بأعمالها معانا دلوقتي ربنا يشفي كل واحد فيكم و يخليه لأهله بس أهم حااااجه نمسك في ربنا اوووووي