كنت مروحة من الكلية ومكانش ف الاتوبيس غير واحد ف الكرسي ورايا وست وراجل كبار ف اول الاتوبيس وحسيت بأيد تحتي 1087624

امبارح حصل معايا موقف كان صعب جدا عليا مكونتش متأكدة اني هقدر احكيه
انا اتعرضت للتحرش ف الاتوبيس من شخص رغم ضخامته الا ان شكله عيل صغير ف ثانوي ممكن
كنت مروحة من الكلية ومكانش ف الاتوبيس الا انا وهو ف الكرسي ورايا وست وراجل كبار ف اول الاتوبيس وحسيت بإيده تحتي بس مكونتش عاوزة اصدق نفسي عشان مش عارفة هتصرف ازاي لو دا بيحصل فعلا
وسعت شوية وفتحت الكاميرا الامامية لقيت ايده فعلا
قفلت الموبايل ومسكت ايده سحبها بسرعة وانا معرفش ايه اللي حصلي في ثانية كنت منيماه علي الكرسي ومكتفاه بيد وبضربه علي وشه باليد التانية وانا بصرخ
الاتوبيس وقف كنا وصلنا الموقف فهو فلت مني وجري بس الست الكبيرة مسكته بتقوله ليه كدا كنت طلعت السماعة بتاعت الموبايل ولفيتها علي رقبته من ورا فرمي نفسه ع الارض عشان اتخنق
كان في ناس كتير اتلمت علي صوتي وراجل صاحب سوبر ماركت بشتري منه كتير وعارف شكلي مسكه وقالي عملك ايه قولتله اتحرش بيا، الراجل نزل فيه ضرب وقالي اضربيه براحتك قلعت الجزمة وضربته علي وشه
وانا بصرخ مش فاكرة كنت بقول ايه ولا فاكرة الناس حواليا كانوا بيقولوا ايه بس كنت مصممة اخده القسم الا انه فلت من الراجل واختفي وسط الزحمة
بعد ما ادركت ان الموقف انتهي انهرت في العياط في الشارع كنت ماشية لحد الموقف بعيط والناس بتبص عليا
انا مش بكتب الموقف دا تحديدا عشان انصح البنات يواجهوا التحرش زي كل مرة عشان خلاص انا فقدت الامل في اي تغيير ممكن يحصل ف المكان دا
ولا كتباه عشان استعرض قوتي لان فعلا انا مش شخص عنيف ومن اسباب حالة الاكتئاب اللي انا فيها من ساعتها بعيدا عن اللي تعرضتله اني بقيت عنيفة وكنت مستعدة اموته بصدر رحب
انا كتباه عشان اعلن اني استسلمت وفقدت الامل واني لاول مرة احس بجد اني مينفعش اعيش هنا تاني، عشان اقول لكل بنت سكتت علي حقها وكل اهل علموا بناتهم ان البنت سمعة وان التحرش بيضر سمعتها هي اني انا وغيري كتير بنحاسب علي سلبيتكم وتخلفكم
لاول مرة احس اني عاوزة اتلاشي ولاول مرة ابقي ماشية ف الشارع وانا مستعدة انقض علي اي حد هيخبط فيا من غير قصد حتي
اتمني لاي حد غلط بنت في يوم عشان واجهت التحرش ولاي بنت سكتت علي التحرش ولاي متحرش انكم تشوفوا الجحيم علي الارض بكل اشكاله، اتمني ان اليأس والاحباط يحاوطكم ومتلاقوش اللي ينتشلكم منه .