خرجت مع واحدة صاحبتى نشم هوا و نشرب شاى فؤجئنا براجل اربعينى غمز لصاحبتى وبعتلى بوسه فى الهواء بشكل حيوانى 1103058

تروى احد الفتيات

خرجت مع واحدة صاحبتى نشم هوا و نشرب شاى كعادتنا فالكريستال على الساعة 6.

قعدنا على ترابيزة جنب الشباك من الناحية اللى على شارع الشهدا وفندق وندسور مش على البحر – للعلم الشارع ده واسع وفيه عربيات وناس مش معزول.

فؤجئنا براجل اربعينى زى الحيطة من اللى ماشيين ف الشارع بيقرب من الشباك اوى، غمز لصاحبتى وبعتلى بوسه فى الهواء بشكل حيوانى مقرف ومشى

احنا الاتنين اتكهربنا جدا وتنحنا كام دقيقة ودمنا اتحرق

بعدها بـ ١٠ دقايق عدى نفس الشخص وهدى قدام الشباك و بيبتسملنا

صاحبتى شتمته، وكأن بلاعة واتفتحت. ألفاظ رهيبة منه

الناس اتلمت جوا القهوة و بيسألوا حكيتلهم اللى عمله وقلتله انت حيوان

فؤجئت انه بيقلع جزمته وبيضربنى بيها مرتين مرة على إيدى و مرة على وشى!

حدفته بكوباية فاضية للاسف ما عملتلوش حاجة. بعدها ما حسيتش غير بحد من اصحابى كان موجود بالصدفة بيبعدنى عن الشباك، والناس بتهدينى و بتشربنى ميه وبيقولولى اغسلى مطرح الضرب عشان ما يورمش. انا عرفت انه ضربنى على وشى من طعم التراب والرملة ومن الوجع الفظيع اللى أنا حاسة بيه لحد دلوقتى، ومش بيروح بمسكنات فى ودنى وعنيا وعضم وشى

شهادة حق الناس اللى فى القهوة أو اللى فى الشارع ربنا يكرمهم ضربوه وبهدلوه وكلهم وقفوا معانا وقالوا لنا شاطرين اخدتوا حقكم. للاسف اختفى فما عرفتش أعمله محضر وللاسف لو الوجع ده فضل مستمر انا مش هاعرف احكى الموقف ده لدكتور

عزة عبد المنعم