البوست ده عن تجربتي مع بنتي في مركز مجدي يعقوب للقلب بأسوان
البوست ده عن تجربتي مع بنتي في مركز مجدي يعقوب للقلب بأسوان.
المكان ده يا جماعة حسب اعتقادي هو المكان الوحيد في مصر اللي تحس فيه انك بني آدم بتحترم آدميتك وبتعامل علي انك انسان.
المكان ده نموذج للمفروض مستشفيات مصر تبقي عليه.
مريم دخلت عشان تعمل قسطرة لغلق ثقب بين الأذينين بس اتضح أن الثقب مش هينفع يتفقل بقسطرة فكان القرار بعمل عملية قلب مفتوح.
المستشفي قمة في النظافة والنظام والتعقيم علي أعلي مستوي التمريض عبارة عن خلية نحل أقسم بالله اول ليلة انا ما عرفت انام من سارة مسئولة التمريض بسبب أنها تقريبا بمعدل كل 45 دقيقة تدخل يا أما ميعاد دوا أو قياس حرارة أو ضغط أو تعمل رسم قلب أو تقولي لازم مريم تصحي تشرب أو تأكل حاجة انا من ساعة ما بدأت الشفت مشربتش ولا كلت كده غلط لازم تصحي تشرب علي الأقل.
مش عايزة اقولكم حتي البامبرز كانوا هما اللي عايزين يديهوني الممرض بيسالني انتي جبتي البامبرز ده منين قولت له انا عاملة حسابي وجايبة معايا قالي لا احنا هنديكي بامبرز ولما قولت له انا معايا ممكن حد تاني يبقي محتاجه غيري قالي خلاص هاتي اوزنه الأول وهو فاضي عشان لازم يوزنوا البامبرز كل شوية بعد العملية.
واحد من الممرضين بيقولي عارفة يا مدام انا زبالة والله انا انسان وحش أوي بس انا من ساعة ما جيت هنا بقيت احترم نفسي مش عشاني عشان (البروف ) ده لقب د. مجدي يعقوب هناك، عشان لو عملت حاجة غلط هيقولوا بصوا بتاع مجدي يعقوب بيعمل إيه والرجل ده مايستهلش مني كده.
اد ايه الإنسان ده جميل قدر يوصل الناس دي علي الرغم من بساطة مستواهم للمستوي الرائع ده من الإنسانية والمسئولية ومراعاة الآخرين.
الأكل قمة في النظافة وتعقيم غير طبيعي و 3 وجبات في اليوم بمواعيد محددة، انا مدفعتش جينه واحد هناك لا في شاي ولا حلاوة العملية ولا الكلام الفارغ ده انا اصلا مكنتش بألحق اطلب التمريض من كتر ما هم رايحين جايين علينا.
الدكاترة قمة في الأدب والذوق ودماثة الخلق وأخص بالذكر د.حسن كامل و د. محمد حسام طبيب التخدير و د. حاتم حسني ود. أحمد عفيفي وكذلك التمريض وخاصة سارة وخالد وللأسف مش فاكرة باقي الأسماء. الاستثناء الوحيد كان ممرضة اسمها صباح فكرتني بممرضات مصر.(فعلا جوه المستشفي تحس انك سفرت بره)
طبعا في الإدارة ماقدرش أنسي ماريان البشوشة الضحوكة
البوست ده لسببين الاول: الأول عشان اقول للناس أن فعلا كل جينه بتتبرع بيه بيروح في المكان الصح وفعلا فعلا المكان ده محتاج تبرعات كفاية أنكم تعرفوا أن مصاريف كفالة سرير أطفال عادي شهريا 12000 جينه وسرير أطفال في العناية المركزة 63000 جينه شهريا برضه.
والمكان فعلا عليه ضغط رهيب عدد سراير قليلة وأعداد مهولة وده سبب أن قوائم الانتظار طويلة؛ انا قابلت واحدة هناك ابنها قعد شهرين في العناية المركزة تخيلوا لما سرير طفل واحد يفضل حاجزه لمدة شهرين كاملين ده هيتسبب في تأخير كام حالة؟
من فضلكم اتبرعوا لصالح مؤسسة مجدي يعقوب للقلب عن تجربة تستاهل.
التاني: اني أشكر الإنسان الرائع اللي كان السبب في بناء الصرح ده وانا مهما قولت برضه مش هاقدر أوفيه حقه
سير مجدي يعقوب أو البروف كما يطلقون عليه بجد بجد شكراً