يوم الصبح وأنا راحة الشغل واحد قاعد في الكنبة الأخيرة ورايا لقيت ايده من جنب الكرسي فوق رجلي بيمسك رجلي 1105272

هحكيلكم أنا أخدت حقي إزاي في موقف أسوأ تقريبا كلنا كبنات وستات مرينا وبنمر بيه
كنت لسة بنت وصغيرة وبروح لشغلي في الهرم بالمواصلات وكان طريق طويل
تقريبا كل يوم تحرش لفظي وجسدي وأنا كنت بتكسف وأروح شغلي دمي محروق أو أروح بيتنا أعيط
يوم الصبح وأنا راحة الشغل واحد قاعد في الكنبة الأخيرة ورايا لقيت ايده من جنب الكرسي فوق رجلي بيمسك رجلي
أنا ماحستش بنفسي إلا وأنا بتدور وبتديله بشنطي فوشه وبشتمه رد فعله المعتاد اللي بيراهن على خوفنا في المواقف اللي زي دي هو البجاحة شتمتي وقالي "انتي فاكرة نفسك حلوة عشان احط ايدي على رجلك دا انتي معفنة" .
أنا وقتها الحقيقة كان حاجة من اتنين يا هايجيلي إنهيار عصبي من القهر يا هاخد حقي
طبعا الناس في الميكروباص بتتفرج وتمصمص شفايفها واللي قدر ينطق بكلمة كانت "خلاص يا آنسة معلش"
ولما فضلت ازعق واحدة ست، تاني "ست" جنبي قالتلي خلاص بقى هو ما خدتش منك حتة
أنا صممت إن السواق يقف عند الكمين اللي جاي في الطريق وقعدت ازعق واهدده اني هعمل واسوي.وأنا في الحقيقة ماكنش عندي واسطة ولا هقدر أعمل ولا أسوي بس كنت عاوزة أخوف السواق بأي شكل عشان يقف واخد حقي
المتحرش قاله ماتقفش ياسطة دي علوزة تعطلنا
وتخيلوا الركاب تضامنوا معاه وقالولي انتي مكبرة الموضوع ما خلاص!
ده جنني أكتر وقلت للسواق لو ماوقفتش خليهم ينفعوك
وفعلا خاف ووقف
وعند الكمين ظابط شاب
أنا شفته في الحقيقة كإني شفت "بابا" مثلا وانا وسط أغراب متوحشين بقيت بعيط منغير سيطرة على دموعي
بس تمالكت وحكيتله اللي حصل وطلعت بطاقتي وقلتله انا بشتغل فين . طبعا الواد انكر انه تحرش بيا وشتمني كمان وكنت من كتر ما المعايير مقلوبة خايفة الظابط يصدقه!
بس بصراحة الظابط شتمه وقاله انتوا كل يوم والتاني تمدوا ايدكم على بنات الناس انا هعملك محضر تحرش ابن وس*** عشان تتربى.
وحكيتله الي الناس عملوه وسلبيتهم عشان ما يتأخروش ف قام بالواجب وكدرهم نص ساعة واقفين بالعربية.
طبعا المتحرش اللي كان متنمر عليا وشتمنى واهني واستقوى بسلبية الركاب كان فار واقف بيعيط عشان ما عملش محضر
والظابط قالي براحتك بس لو هنعمل محضر هننزل اقرب قسم وهتقضى كام ساعة هناك
قلتله انا مش عاوزة احبسه انا عاوزة اربيه الظابط قالي انا هخليه مقضى النهاردة جنبي يتهزأ عقابا ليه.
لما كبرت بقى واجوزت
راكنة عربيتي فمكان ورايحالها .واحد فضل ماشي جنبي بعربيته مسافة طويلة "اركبي .اوصلك تعالي" والجو القديم اللي انتوا فاهمينه وانا امد ويقولي كلام خادش وانا امد اخر ما زهقت نزلت جبت طوبة وحدفت العربية كسرتله ازاز الشباك اللي ورا
هو صحيح شتم وجري زي الفار والناس افتكرتني مجنونة .بس بجد كنت مبسوطة من العقاب اللي عاقبته بيه لانه كان رزل وفرحان بعربيته المعفنة وماشي جنبي مسافة طويلة بمنتهى السخافة!
طبعا مش كل وقت ولا كل حد ينفع يتعمل معاه كده ومش كل كلب هوهو يترد عليه لان رد الفعل مش مضمون . انما مد الايد على الجسم ده شيء يستوجب العقاب وانا فيه ما بسيبش حقي.