الشاعر محمد فتحي يكتب أزاي القاتل دايما مجنون ردوا عليا يا أهل القانون
عجبي علي بلد مش لاقية راجل ولا محكومة
فى بلد فيها المسيحي أنضرب بنار الحكومة
عجبي من بلد حاميها شوية أباليس
دم المسيحي فيها دايما رخيص
ليه حقوق المسيحي دايما معدومة
عجبي علي حكومة تقتل القتيل و تمشي في جنازته
عجبى على حكومة فيها القانون دايما نايم و واخد أجازته
أمتي حق المسيحي مرة يتجاب
يا حكومة حاكمها شوية أرهاب
قانونك تعيشى أنتى ميت ولا له عازته
أنا اللى أخويا المسيحي عايش في وطنه زي الغريب
بيتهجر من بيته و كنيسته بيقفلوها و يلعنوا الصليب
عايش فيها خايف علي أولاده
حاسس أنه رخيص فى بلاده
أمتى يا مصر تلمى جرح المسيحى أمتى يطيب
المسيحى شاف اللى بيحميه ضربه بالرصاص
المسيحى دينه أساسه المحبة و الأخلاص
دينه قاله حب عدوك و لازم تسامحه
سامح كتير لكن شاف الغدر فى ملامحه
المسيحى بيصرخ و يقول عليه العوض خلاص
أخويا المسيحي بينقتل و يندبح و مضطهد لأجل دينه
مع أنه دايما لا يعرف عداوة ما بين أي حد و بينه
عمره ما كره في مرة أبدا حد
قصر المحبة جواه مستحيل ينهد
ليه المسيحى في وطنه دايما مضطهدينه
المسيحى عمره ما يسلم مهما كان موجوع
المسيحى فى قلبه النار و عينيه ماليها الدموع
دايما مطمن قلبه
بيصرخ و ينادى ربه
مؤمن و عارف أن صوته في السما مسموع
قاتل المسيحى بيطلع مجنون و مختل
لا حد لاقي ليه دواه ولا حتي أيها حل
أزاي القاتل دايما مجنون
ردوا عليا يا أهل القانون
الواحد خلاص بقى جاب أخره و مل
المسيحى غيره حاكم عليه بدخول النار
عايش فى حاله كأنه عليه التار
بيسأل أزاي و ليه دمه مهدور و حلال
نفسه حد يجاوب مرة على السؤال
حد يرد كفاية خزى و كفاية عار
الضرب مش لازم يكون بسلاح
الضرب هو إعدام كل سفاح
لازم يتفعل القانون
يا حكومة سنى السنون
أقضي علي كل ديب و تمساح
كلمات
محمد فتحى