مواضيع عامه خاص لموقع الحق والضلالمع كل حادث طائفي بيتقتل فيه مسيحيين في مصر، بدل ما تلاقي اعتذار و تعاطف مع الضحايا ومع اللي بيتعرض ليه المسيحين في مصر كحد أدنى من المسئولية الأدبيه، بتلاقي شوية بني آدمين سخيفة داخلين يزايدو بكل بجاحه ويقولو مفيش حاجه اسمها مسلم ومسيحي كلنا بنتعرض للإضطهاد والظلم!! واللي هو كلام نظري هدفه الغلوشة وخلاص! ايوا كلنا بنتعرض للظلم والإضطهاد بس مش كلنا بنتعرض ليه على أساس هويتنا الدينية! انت عمرك نزلت العيد وخفت على نفسك من شوية مسيحيين متطرفين يفجرو الجامع اللي انت بتصلي فيه انت وعيلتك؟ بتحتاج تصريح من المحافظ عشان ترمم جامع؟ بتترفض في مناصب حكومية وتعيينات في بعض الجامعات كمعيد عموما وفي بعض التخصصات أحيانا عشان مسلم؟ ليك قريب حد صفاه في الشارع قبل كدة عشان مسلم؟ اتعرضت لمجموعة غوغائية نهبت كل محلات مسلمين المنطقة وولعت في بيتك وبيوتهم عشان عيل مسلم كان ماشي مع بنت مسيحية؟ قعدت في جلسات عرفية بإشراف قيادات أمنية كانت نهايتها الحكم بتهجيرك من قريتك أو مدينتك انت وأهلك عشان مسلم؟ الدولة اللي انت فيها بتقسم الميراث بتاعك وفقا للدين للمسيحي؟ في مجموعة مسيحيين حاصرو جامع جديد بيتبني وعملو مظاهرات وشغب عشان رافضين بنى جوامع في قريتهم وحد منهم قال في جلسات عرفية علنا لو حكمت ابنو جامع من غير مئذنة"أصل منظر المئذنه بيستفذ مشاعر بعض الناس في القرية"؟ . بتسمع عالفضائيات كل يوم نقاشات عن حرمانية أن جارك المسيحي يقولك في العيد كل سنة وانت طيب؟ أو حد ناقش ولائك الحقيقي هل هو لمصر ولا للسعودية عشان انت متحد معاهم في الديانه؟ مكفاية سداغه وجليطه وإستعباط بقى!!
