شقيق محمد على يخرج عن صمته ويوضح أكاذيبه
شقيق محمد على يخرج عن صمته ويوضح أكاذيبه
فضح أحمد شقيق الفنان والمقاول محمد على كذب ادعاءات شقيقه التى يعلنها فى مقاطع فيديو يبثها من إسبانيا.
وقال شقيق محمد على فى مقطع فيديو، نشرته صفحة "محبى عبد الفتاح السيسى القائد والإنسان والقدوة"، على موقع التواصل الاجتماعى "فيسبوك": "أنا أخو محمد على أنا عملت الفيديوهات دى عشان الموضوع عدى حدوده دلوقتى أنا قاعد زيى زيكم لقيت فيديوهات عن محمد إنه مناضل، مناضل إيه يا محمد يا على، دانا أخوك، مناضل فين أنت كنت بتروح القرى والنجوع فى القرى، ولا بتناضل فى مارينا عند الفيلا؟".
وأضاف: "لو أنت مناضل وتمام والفلوس تمام زالحياة تمام، فأنا بقولك اللى خلانى أعمل الفيديوهات إنك مبتردش علينا وفضحتنا، فاحنا هنفضح بعض بقا، هو النجم اللى عامل رجولة وابن بلد بيعمل بلوك لأهله، وتخلى أبوك لسانه يدلدل عشان يوصلك وفى الآخر السكرتير هو اللى يكلمه يقوله الباشا مش فاضى، وأنا أخوك مش عارف أوصلك فمتعملش بقا شعبى وابن بلد ومناضل".
وتابع: "أنت بتقول الناس زعلانة عشان العربية الفيرارى بتاعة ميسى هديكم حقها لا مش عايزين حقها، هات فلوس الراجل الميت اللى الناس بتلم ليهم عشان تدخل عياله المدرسة".
واستطرد شقيق محمد على: "إيه اللى أنت بتعمله دا أنا مشفتكش مناضل أنا كل اللى أنا شايفه فيرمونت ومارينا ولانشات، وفيلل ومش عايز أتكلم بقا لأن اللى جاى كتير، فمناضل دى طلعت إمتى؟ اللى اشترى عربية ميسى يدى فلوس الغلابة ليهم نفرض إن أخوك دا راجل غلبان ومعندوش فلوس وأنت راجل مقتدر، متقفش جنب عياله اللى مرميين فى الشارع دا لا دا اللى زاد وغطى إنك واخد فلوسه، عشان تشترى عربيات وتعمل فيديوهات".
وأكد: "أنت جنون الشهرة عاميك، دانا أخوك، مش عايز أتكلم وأقول أنت بتعمل إيه عشان تطلع فى لقطتين تلاتة، فأنت كنت بتعمل حاجات مش طبيعية وفى الآخر لقيت نفسك مغمور ومحدش عارفك، فتطلع تتكلم زى الناس الهبلة عشان الناس تشوفنى، فأنت جيت فى سكة مقفولة".
يشار إلى أن هذا هو المقطع المصور الثانى الذى يبثه شقيق محمد على لفضح أكاذيب الممثل المغمور.
هذا الخبر منقول من : مبتدأ