شقيق عادل لطفي ضحية امين الشرطة يكشف اخر التطورات ويطالب بتدخل وزير العدل

كشف عماد لطفي شقيق ضحية امين الشرطة عادل لطفي عن اخر تطورات القضية قائلاً: انا بقالي فتره مش بنزل اخبار علشان مكنش فيه جديد غير انها بتتأجل واخر حاجة ان دائرة المحكمة تغيرت وطالبوا محامين المتهم بأن يعرضوه علي علي مستشفي العباسيه كنوع من المماطله وهو المفروض حاليا يكون رجع من العباسيه ومستنين التقرير.

واضاف: عندنا جلسه الشهر ده يوم ٢١ مفروض يكون التقرير وصل وميكونش فيه اي تلاعب في الاجراءات علشان متتاجلش تاني ويكون جلسه نطق بالحكم الحقيقه انا مش متفائل وشايف ان فيه مماطله في الاجراءات مع ان كل الورق خلص والقضيه مفروض تكون كده متقفله القضيه مفروض تتوصف قضيه رأي عام الشيطان ده لازم ياخد اعدام ويكون عبره هو واهل بيته لازم يكون القانون قوي ورادع.

وتابع : لازم تكون اجراءات الحكم سريعه لتهدئه الرأي العام الشيطان ده لو ماخدش اعدام يبقي احنا عايشين في غابه يحكمها البلطجه سبب انتشار الجرائم هو ضعف تطبيق القانون الرادع اللي يخوف اي حد انه يتعدي علي الاخر للاسف عندنا اجراءات روتينيه في المحاكمات عايزه تتغير لانصاف المظلوم وتهدئته.

واختتم : مطالباً من رئيس الجمهورية ووزير العدل بالتدخل لتسريع اجراءات الحكم وتهدأه نار قلوب كتيره مستنيه تشوف بلد بيسودها قانون قوي ورادع عادل مش هيرجع تاني لكن ممكن يبقي فيه الف عادل لو متطبقش القانون بقوه وحسم عادل ممكن في يوم يكون ابنك او اخوك لو متطبقش القانون عادل راح علشان يبقي فيه تغيير بسببكم انتوا القضيه وصلت للرأي العام وبسببكم انتوا برده هتغيروا كتير احنا مش عايزين غير حق الدم ونشوف بلد قانون حق دم عادل لازم يرجع.