زمن الاختطاف الحزن يخيم علي السوشيال ميديا بعد انتقال عروسة المسيح مارينا

رقد على رجاء القيامه عروسة المسيح مارينا غطاس فخري واقيمت صلاة الجنازة علي روحها الطاهره كنيسة الشهيدة دميانه وقد نعاها ابونا اثناسيوس ابن عمها بأروع الكلمات قائلاً: حلوه السما يا توتا ؟ شوفتى بابا يسوع ولا لسه ؟ الملايكه شكلهم ايه ؟؟ شوفتى مين فى القديسين ؟ عرفوكى بنفسهم ولا لسه بتتعرفى ؟ ماما العدرا جات ولا مشغوله عشان تسبيحات كيهك ؟.

واضاف: عموما عارفك مشغوله دلوقتى ومش فاضيه لحد ملايكه بيزفوكى وترانيم وتهليل حقك يا عم ماتكونيش فاضيه لحد طبعاً مبروك يا حبيبتى وصولك السما الحلوه انتقلت إلى الأمجاد السماوية عروس المسيح بنت عمى مارينا غطاس والصلاه هتكون فى كنيسة الشهيدة دميانه.

الموت هو الحقيقه الوحيدة اللي يومياً بيثبت ان الحياة ملهاش قيمه الموت هو افضل عظة للتوبة الموت رغم انه بيوجعنا على غيرنا بننسى تماما ان بكره هايوجع غيرنا علينا ساقية بتدور ومازال بيخطف الناس الحلوة اللي هاتوحشنا قعدتهم ولمتهم والكلام والضحك معاهم.

هايوحشنا حضنهم وسؤالهم وطبطبة ايديهم
هايوحشنا اسمهم اللي بيظهر على الموبايل وابتسامتهم اللي بيقابلونا بيها.وبالرغم من كل الوجع فيه حتة نور بتقول ليس هو موت لعبيدك بل انتقال والمنتقليين مابيمتوش بيفضلوا عايشين في كل حتة فينا في كل مكان بنروحه بيحسوا جدا بينا وبيفرحوا بنجاحنا وبيحزنوا لتعبنا عزي يارب كل نفس بتتألم واملاها تعزية وفرح ويقين ان الاموات احياء في سماء لا تعرف الموت.