مينا عبد السيد كان ملاك عالارض بشهادة كاهن كنيسته ابونا ديماس نادر
عمري ما كتبت لحد بعد ما رحل عن عالمنا الارضي الفاني ولكن هكتب علشان إفتكر المشاعر و الافكار إللي كانت جوايا في اليوم دة هحتاج إفتكر كل سنة تمر عليا إني ابقي مستعد للقاء الله لأني ما عرفش لا اليوم ولا الساعة ولا الطريقة!!
واضاف: عرفنا إنك اتنيحت في نفس يوم تذكار العدرا مريم وليكن تذكارك الي الابد يمكن كنت بسيط جدا في تعاملاتك وكان نفسك تخدم أي خدمة وفعلا إنت خدمت في ٤~٥ أيام خدمة يمكن محدش خدمها في سنين طويلة خليتنا نصلي في بيوتنا ونطلع نصرخ علي المذبح خليتنا نجتمع علي قلب رجل واحد ودي حاجة مش بتحصل كثير!!
واكمل: اظهرت معادن الناس مين إللي بيخدم ومين إللي بيسحب نفسه وأيا كان سبب موتك عايز أقول للكل:صوت دمك صارخ إلي الله من الأرض الله ظابط الكل سمح إنك تعدي أيام غربتك من أقصر الطرق دخلت من باب الألم الباب الضيق إللي أخره الحياة الأبدية وعن نفسي واثق في مكانتك إللي في السماء فرحان بإللي إنت وصلت له.
وتابع: أكثر حاجة وجعاني فراقك أسئلتك إللي كنت بتسألها وعايز تفهم بساطتك ابتسامتك يا بختك عرفت إجابة كل أسئلتك كنت علي الارض تنظر في مرآة، في لغز، لكن الآن وجها لوجه كنت تعرف بعض المعرفة لكن الآن عرفت كما عرفت (١كو ١٣ : ١٢) كنت بتسألني بس دلوقتي أنا إللي محتاج اسألك كنت بتطلب صلاتي ليك لكن دلوقتي أنا إللي محتاج إنك تصليلي هكذا يكون الآخرون أولين والأولون آخرين، لأن كثيرين يدعون وقليلين ينتخبون (مت ٢٠ : ١٦) لكن ما ينفعش نبقي انانيين في حبنا ليك ما ينفعش تبقي إنت رايح مكان الراحة وإحنا نقولك خليك في ارض الشقاء.
واختتم: واثق إنك دلوقتي في فردوس النعيم مكان الانتظار للابرار في حضن آبائنا إبراهيم واسحق ويعقوب بتسمع كلمات لا ينطق بها، ولا يسوغ لإنسان أن يتكلم بها (٢كو ١٢ : ٤) واثق إنك هتشوف ما لم تر عين، ولم تسمع أذن، ولم يخطر على بال إنسان: ما أعده الله للذين يحبونه (١كو ٢ : ٩) حقك محفوظ ومش هيضيع لأن الفاعل مستحق أجرته (لو ١٠ : ٧) اجرتك و مكانتك محفوظين في السما الدور والباقي علينا إحنا إللي عايشين علي الارض عن نفسي فيا ويلي ويا أسفاه فات العمر ولا ادراه أجر الكرام اجراه وأنا خالي من الأجرة محتاجين نصلي لأجل اسرته إن ربنا يديها تعزية محتاجين نراجع نفسنا كل واحد يسأل نفسه: مستعد للقاء الله ولا هيبقي خايف من اللحظة دي أخيرا الكلام كثير بس إللي يكتب وإللي اتكتب كثير بس إللي يقرأ إللي قرأناه كثير بس إللي يعمل بإللي قراه ليعطِ الله رحمة لبيتك حقا إنك مينا عبد سيدك ليكن تذكارك الي الابد اذكرني دايما.