الفنانة بسمة تكشف تفاصيل تعرضها للتعدى غير الاخلاقى حاولت أصوت بس محدش لحق

كشفت الفنانة المصرية بسمة عن تعرضها لواقعتي تحرش، وذلك خلال حلولها ضيفة على برنامج الستات مع الإعلاميتان سهير جودة، ومفيدة شيحة.

و قالت بسمة: أنا حصلي حادثتين تحرش كبار في التجمع، والكلام كان من حوالي 12 سنة، والحادث كان أكبر من إني أعرف أتصرف معاها وأدافع عن نفسي، فوقعت على الأرض وكان فوق الـ100 رجل وكنت هموت ومبحبش أتذكر تفاصيله .

وأضافت أما المرة التانية كان واحد بيحاول يمد إيده عليا وعرفت ساعتها أواجهه وأضربه بالقلم، أنا شخصية عندي صلابة وتحدي، وخضعت لورش تمثيل في الخارج عشان أنمي موهبتي التمثيلية، والناس واخدة فكرة عني إني فنانة متكبرة أحيانًا وأنا على العكس شخصية متواضعة وبحب الناس .

و يشار إلى أن الفنانة المصرية بسمة قد شاركت بتجسيد أدوار كوميدية من خلال العيادة و حريم كريم ودور بفيلم مرجان أحمد مرجان والعديد من الأفلام والمسلسلات.

تفاصيل حادثة التحرش الثانية
وأوضحت بسمة خلال تصريحات تليفزيونية لها، أنها حاولت تستغيث حاولت أصوَّت لكن الحادثة كانت أكبر من إني أعرف أتصرف معاها لدرجة إن أنا فيه لحظة وقعت على الأرض وكان فيه فوق الـ100 رجل فوقيا وقولت أنا هموت والموضوع تعدى التحرش وأنا هموت .
وتابعت: مبحبش أقعد أفتكر كتير تفاصيل بس اللي ربنا اداهولي بعد كده إن حد حاول يمد إيده عليا فعرفت أمسك إيده وألطشه بالقلم فحسيت إن أنا عملت حاجة والواحد في اللحظات اللي زي دي بيبقى حاسس إنه قليل الحيلة ونفسه أي حد يساعده وينجده وأكتر إحساس بيقتل لما عينك تيجي في عين حد وانتي بتستغيثي وميعبركيش ودي قاسية جدًا .
قولت لهم مش هرضع
وحكت بسمة عن كواليس الأيام الأولى لأمومتها قائلة أنا كنت بقول لهم أنا مش هرضع ولما سألوني ليه يا بسمة مش هترضعي، قلت لأن أنا مش بقرة وأنا مش همارس دور البقرة في حياة حد وأنا انتهيت إني أنا رضعت سنتين طبيعي وأول ما الموضوع مشي وعرفنا أنا وهي وبقى فيه إحساس الرضاعة قعدت سنتين أرضع ، مضيفة: أول يومين تلاتة كانوا بيجروا ورايا بالبنت وبيقولي لي رضعيها وأنا أقول لا لا لا وأنا عارفة من أول لحظة إني حبيتها لكن مش عارفة أتعامل معاها ومش عارفة إيه دي وشوية شوية لما قعدنا لوحدنا ساعتها حصل .
وأكدت أنها رفضت أن تنام ابنتها الرضيعة بجوارها مفيش هي عيل هينام جنبي أنا بتقلب ونومي تقيل ومش عايزة وجبت السرير وكنت عايزة من أول يوم رجعت من المستشفى إنها تقعد في السرير ده وفضلت سنين بننام جنب بعض والحقيقة أدين لأبوها بالفضل لأنها عملها تدريب النوم لأنها تنام لوحدها لأني معرفتش أعمل ده .