مارينا مجدي الفتاة القبطية المختطفة لازم ترجع لاسرتها

كتب احد اقارب مارينا مجدي قائلا: لما بنطلب المساعدة على النت الحقيقة احنا بندور على اى حد عنده ايمان ان مارينا راجعة حتى لو الايمان ده قليل قوى حتى لو قد حبة الخردل حبة خردل اللى نقدر بيها ننقل جبال ونعمل معجزات علشان كده بنطلب من كل واحد ان يصلى لمارينا جايز تكون حبة الخردل اللى محتاجينها دى عندك انت ماتبخلش علينا بيها صلى واطلب من ربنا رجوعها واحنا واثقين ان الهنا هيستجيب.

واضاف: يارب نحن لا نعرف ماذا نفعل ولكن نحوك اعيوننا . بنطلب انكوا تكملوا صلاة من اجل بنتنا مارينا علشان ترجع لبيتها ولمكانتها وكمان طلبه خاصة من اجل عم مجدى باباها اللى استحمل كتير وهو دلوقتى فى محنة ومحتاجنا كلنا نصلى له . ورب المجد بيقول تشدد وتشجع ولا ترتعب لان الرب الهك معك حيثما تذهب امين لنا صلاة ومذبح تهتز لهم السماء.

وتابع: الوقت بيمر بصعوبة وبطئ جدا على اى حد مننا لما يكون فى محنة او ضيق . مابالك بأسرة عايشه فى ضيقة ومحنة مستمرة يومهم طويل والحزن مخيم عليهم وليلهم طويل ملهوش اخر والدموع مصحباهم . بنصلى ان ربنا يغير حياتهم ويرجع النور والضحكة تانى جوه الوشوش . يعوض الحزن والخوف من بكرة لفرحة ماشفوهاش قبل كده . استحب يارب لصلاتنا من اجل عبتدك مارينا . شارك معانا صلاتنا.

واختتم: كل ما يجي الوقت عليك وتحس باليأس . أو تقول مش هترجع . أو أى كلام من أى نوع . أفتكر أن فيه أسرة بحالها حياتها بقيت صعبة جدا من غير وجود مارينا . من غير وجود مارينا فى أب مكسور وأم حزينة وأخ دموعه جواه طول الوقت فيه أسرة الوجع بقي معاهم طول أيامهم والنوم بقى كوابيس . والناس بقيت قاسية عليهم وبيدبحوهم كل لحظة بنظراتهم وبكلامهم لو مش هتقدر تساعدهم بلاش تكون حمل زيادة عليهم كل اللى بنطلبة منك . أنك صلى وأطلب من ربنا أنه يرجع بنته لحضن أبوها.