مازال دكتور محمد علام نائب مدير مستشفى العزل بالنجيلة سابقاً يحذر من عدم ارتداء الكمامة للمرة المئة من خلال صفحتة الرسمية علي موقع التواصل الاجتماعي فيسبوك قائلا : نقول تانى لو مفيش غيرك لابس الكمامه فانت صح وهما غلط عدم حديثى عن المرض المنتشر الفتره اللى فاتت لانى زهقت، ملتزم هيفضل ملتزم واللى مش ملتزم مش هيلتزم، كان التزم على مدار السنتين اللى فاتوا.
واضاف : المرض المنتشر هذه الفترة مخلصش وفى فئات معرضه للخطر دى حقيقه، لكن الدنيا اتحسنت دلوقت شويه ومع اللقاحات بتبقى افضل لكن معدل اللقاحات عندنا بيزيد ببطء ولازم يزيد والتوعيه تزيد باللقاحات، الكمامه مازالت مهمه وضرورية فى الاماكن المغلقه والتجمعات حتى لو واخد اللقاح (لو مش علشانك هيكون علشان اهلك وغيرك).
وتابع : فى تحورات بتحصل وهتحصل وفى تحور جديد من اول مارس العالم كله بيتكلم عنه وانتشر فى دول كتير واتسمى اوميكرون الخفى او stealth omicron لانه مببظهرش فى تحاليل ال pcr واللقاح ضعيف معاه لكن حتى الان مش خطير ونادرا لو بيوصل الرئة واعراضه زى اوميكرون من بسيطه لمتوسطه لانه فى الاساس تحور فى اوميكرون وهيكون السائد فى العالم الشهور المقبله والخوف ان يحصل فيه تحور يخليه شديد هنا هيكون الوضع خطير لكن لحد دلوقت محصلش الحمد لله.
واختتم : الكمامه مفروض تكون روتين حياتك الفتره القادمه انا عن نفسى مبقلعهاش فى الزحام والاماكن المغلقه وفى المواصلات مش خوفا على نفسى بس خوفا انى انقل العدوى لحد انا مش قد الذنب ده ان حد يتلأذى بسببى ولو الكل مش لابسها انا مش هقلعها قريب.
