البيتزا ماتظبطش معاكي تعالي جربي الوصفه دي وهتطلع مظبوطه ميه في الميه

هذا الموضوع خاص لموقع الحق والضلال

كتبت ليليان بولس

نوع الاكله : رئيسي

فيه حاجات بسيطه كدا لازم تاخدي بالك منها وانتي بتعملي البيتزا عشان تظبط معاكي وتطلع اجمل من اي بيتزا اكلتيها اول حاجه خدي بالك من الخميرا لان معظم الخميره الفوريه مابتخمرش وبتبوظلك العجنه انا جربت خميره طلعت ممتازه روحي اي سوبر ماركت وهاتي منه خميره مستورده بتبقا في كيس كبير كدا حوالي 450 جرام دي هتظبط معاكي جدا وسريعه جدا

المكونات :

3 كوب دقيق

2 ملعقه صغيره خميره

2 ملعقه صغيره خل

2 ملعقه صغيره عسل نحل او سكر

نصف ملعقه بيكنج بودر

2 ملعقه كبيره زيت

ملح

3 ملعقه صغيره لبن بودره او نصف كوب زبادي

كوب ماء دافئ للعجن

طريقه العمل :

تدوبي معلقتين الخميره في كوبايه الميه الدافيه ومعاها السكر او العسل زي ما تحبي وبعدين تخلطيها مع نص مقدار الدقيق , العجينه هتبقا سايله معاكي شويه غطيها وسبيها عشر دقايق دا بيساعد علي انها تخمر بسرعه, بعد العشر دقايق هتلاقيها خمرت شويه ضيفي باقي المكونات باقي الدقيق والملح والخل واللبن البودره او الزبادي والزيت والبيكنج بودر واعجني كويس وشوفي لو احتاجت شويه ميه كمان المهم تخلي العجينه مرنه في ايدك مش مكبوسه وغطيها كويس وسبيها في مكان دافي ممكن تسخني الفرن 3 دقايق وتطفيها علي اد ما تبقا دافيه ودخلي عجينتك جواها هتخمر في حوالي نص ساعه

في الوقت دا حضري حشوه البيتزا

مكونات حشوه البيتزا :

جبنه شيدر مبشوره

جبنه موتزريلا

فلفل الوان

زتون مخلي شرايح

واي لحوم عندك مفضله زي اللحمه المفرومه او بيبروني او هوت دوج وممكن تكتفي بالجبن بس

بص شرايح حسب الرغبه

شوحي اللحوم ومعها البصل وبعدها الفلفل الالوان لحد مايدبلو وبعدين في صنيه مدهونه بالزيت افردي العجينه بتاعتك وخليها رفيعه جدا جدا وشكشكيها بالشوكه كلها عشان تستوي كويس وماتقبش منك وعليها رشه جبنه شيدر وموتزريلا وبعدين اللحوم اللي انتي عاوزاها ومن فوق خالص شيدر وموتزريلا تاني بس اكتر غطيها بيهم ودخليها الفرن علي اعلي درجه حراره وخليها في نص الفرن عشان ماتتحرقش بعد خمس دقايق افتحي الفرن وشوفيها لو لقيتي العجينه من تحت بقي لونها دهبي يبقا كدا تمام استوت لو لسه استني كمان دقيقتين بعد ما تستوي شغلي الشوايه من فوق عشان الوش يحمر وبالهنا والشفا