طريقه جمبري اسكندراني هتاكلو وتدعولي

هذا الموضوع خاص لموقع الحق والضلال

كتبت ليليان بولس

نوع الاكله : طبق رئيسي

زي ما عودناكم ان كل اكله بنكتبها هنا بتبقي متجربه ونتيجتها مضمونه ميه في الميه

المكونات :

1 كيلو جمبري جامبو بقشره

2 بصله مقطعه شرايح او حلقات

1 حبه فلفل اخضر حلقات

1 حبه طماطم من غير قلبها مقطعه شرايح

1 لمونه

3 فص توم حلقات

ملح وفلفل وكمون

كرافس ان وجد

طريقه الطهي:

في مصفي نغسل الجمبري بالميه بسرعه ونسيبه يتصفي من الميه عشان ما يتبهدلش وتتاكدي انه مفتوح من سلسله ضهره ومتنضف ,متشال منه سلسله الرمله وبعدين نعصر عليه لمونه او لمونتين ونسيبه عشر دقايق ونشطفه ونصفيه عشان نشيل الظفر منه , وبعدين نجيب حله متوسطه ونحط فيها حوالي معلقتين زيت كبار نسيبه يسخن شويه ونضيف عليه البصل وعليه رشه ملح بسيطه ونقلبه اول ما يدبل شويه بعد حوالي دقيقه نضيف عليه الجمبري المتصفي من الميه وعليه رشه فلفل وملح بسيطه ونقفل الغطا بتاع الحله ونمسكها من ايديها ونرجها نقلب الجمبري من جواها لان الجمبري لو اتقلب بمعلقه بيتهري ونرجعها تاني علي النار نستني 3 دقايق ونرج الحله تاني نقلبهم ونفتح نشوف اول ما يبقا الجمبري كله لونه وردي نحط الفلف الاخضر الحلقات والتوم والطماطم ورشه كمون وشريحتين لمون رفيعين مش اكتر عشان مايمررش واخر حاجه الكرافس ونقفل الغطا ونسيبه 3 دقايق كمان ونرج الحله لو عاوزه شربه منه ممكن تضيفي كوبايه ميه سخنه عليهم وتسبيه حوالي من عشر دقايق ل ربع ساعه مش اكتر وتطفي عليه وتقدميه

وبالهنا والشفا