حارمه ولادك من الانشون عشان بيجيب امراض دلوقتي اعمليه في البيت وانتي مطمنه بطعم احلي وبسيط جدا

هذا الموضوع خاص لموقع الحق والضلال

كتبت ليليان بولس

جربي معانا وصفه اللانشون البيتي دا بالفراخ او اللحمه بطريقه بسيطه جدا

المكونات :

نص كيلو لحم فراخ مفروم او لحمه مفرومه حسب الرغبه

معلقه كبيره ممسوحه بصل بودره

معلقه كبيره ممسوحه توم بودره

معلقه صغيره ممسوحه فلفل اسمر او ابيض

نص معلقه صغيره بابريكا

معلقه كبيره دقيق ابيض

بيضه واحده

ملح

زتون مخلي حلقات للحشو

الطريقه :

افرمي صدور فراخ بانيه لدسم اقل او وراك او الاتنين مع بعض لكن الصدور بس صحيه اكتر واخلطي معاها المكونات السابقه كلها واخلطيهم كويس مع بعض وومكن تفرميهم مع بعض تاني في الكبه بعدين افردي بلاستيك رول علي سطح المطبخ بتاعك طبقتين علي بعض وافردي جواه عجينه الفراخ بتاعتك وفي نصها حطي الزتون مش كتير واتني البلاستيك علي عجينه الفراخ مع الحرص ان الزتون يبقا في النص ولفيها علي شكل الانشون التقليدي شكل الاسطوانه وابرمي البلاستيك من الجانبين كويس جدا بحيث ما يدخلهاش هوا وبعدين غلفيها في ورق فويل وابرمي الجانبين برضو يمين وشمال وسقطيه في حله عميقه فيها ميه بتغلي , سبيه يغلي لمده 40 دقيقه وبعدين اطفي عليه وسبيه جوا الميه لحد ما الميه تبرد وبعدين دخليه التلاجه يسقع وبعدها قطعيه وقدميه وبالهنا والشفا