القبض على اسلام واتهامه بالكفر بسبب انه شايل صورة العدرا فى جيبه

انا اسلام بكر شغال فى مجموعة طلعت مصطفي العقارية النهاردة وانا كنت فى المترو حصل معايا الاتي :
الظابط : لو سمحت ممكن تتفضل معايا !
انا : خير !!
الظابط : خير يا حبيبي متقلقش (ايده ع كتفي وبندخل المكتب) بطاقتك يا استاذ وطلعلي كل اللي في جيوبك
انا : بطاقتي بجددها حضرتك وده وصل التجديد ودي صورة البطاقه ودي شهاده الميلاد وديصورة من موقفي من التجنيد
الظابط : اركن دول ع جنب دلوقتي وطلعي كل اللي معاك وافتح الشنطه دي !
انا : عنيا (طلعت كل اللي في جيوبي) (وهو بيفتشني بعد ما طلعت اللي في جيوبي)
الظابط : انت منين ؟
انا : حلوان
الظابط : شغال ايه ؟
انا : شغال في مجموعه طلعت مصطفى العقاريه
الظابط : ممعكش حاجه حلوة ولا ايه ؟
انا : تقصد ايه يا باشا !
الظابط : حته حشيش نص حبايه كده يعني
انا : للاسف مبشربش الكلام ده (وهو بيقلب في الشنطه)
الظابط : شيل يا استاذ الفلوس دي حطها في جيبك ومسك المحفظة بيفتحها ويقلب فيها شاف صورةالعدرا مريم بيرجع يبص في صورة البطاقه وبيشاور ع صورة العدرا وبيقولي ايه ده
انا : دي صورة العدرا
الظابط : والله !! بتعمل معاك ايه انت مسيحي ؟
انا : مسيحي واسمي اسلام طب ازاي يا باشا
الظابط : اومال بتعمل معاك ايه ؟
انا : بتبارك بيها فيها حاجه وبعدين هي ستنا مريم للمسيحين بس ولا ايه مش احنا بنأمن بكل الرسل ولا حضرتك شايف ايه ! (صمت مع نظرة اشمئزاز)
الظابط : انت بتصلي ؟
انا : هيفرق مع حضرتك !!
الظابط : اكشفلي ع البطاقه دي بس انا برده شاكك انك معاك حاجه مخبيها
انا : يا با باشا اقلعلك هدومي طيب (بنظرة سخريه)
الظابط : لا تقلع ايه يا راجل ده انت عزراء .
انا : افندم !!
الظابط : انت متأكد انك مسلم يا ابني ؟
انا : اه مسلم لا اله الا الله
الظابط : مش كافر يعني !
انا : حضرتك متعرفش ان حرام تكفر حد ع وجه الارض
الظابط : عشنا وشوفنا مسلم شايل العدرا وهيديني مواعظ ! لم حاجتك يا افندي واتكل يلا
الفكره هنا هتفرق معاك مسلم ولا مسيحي ده هيفرق في شغلك !! مسلم وشايل صورة للعدرا وهو بيتبارك بيها ومؤمن بيها زي ما هو مؤمن بكل الرسل زي ما ديننا وصانا هل ده هيفرق معاك !! هو عشان مسلم شايل صورة للعدرا تشك فيه وتبقى عاوز تتلكك له وتقعد تسخر منه انت واللي معاك !! يا ريت مخنا يعقل وقلوبنا تصفى اصل انت لما تقول كده انت بقيت مسلم درجه اولى عالم مريضه
#العدرا_ملازماني
#انا_مسلم_مش_كافر
#شييييير على اوسع نطاق