نعي القس جوناثان رفعت كاهن كنيسة العذراء مريم والانبا تكلا بالعبور عروسة المسيح كيرمينا باصعب الكلمات التي تبكي العين بعد مصرعها خنقاً من سخان الغاز وقال من خلال صفحتة الرسمية على موقع التواصل الاجتماعي فيسبوك: كيرمينا بنتي الغاليه فرحان علشان روحتي ليسوع يا بختك لان دي امنيه انا بتمناها ولسه ربنا مدهانيش.

واضاف: بس تعبان جدا انك روحتي فجاءه وبسرعه اللي معزيني انك اتناولتي وقعدتي معايا واعترفتي واخر كلمه قولتيها ليا ( انا علشان مازعلكش اموت احسن ) قولتي كلام كتير معايا انهارده مش قادر انساه يمكن انا عارفك بقالي سنه بس هايوحشني جدا وجودك في الكنيسه وطريقتك وضحك واسئلتك الكتيره.

ربنا يصبر اهلك بس نفسي يجي اليوم وارتاح زيك اعملي بقي زي ما قولتلك اصليلك وانتي كمان تصليلي صليلي اوي سلام يا كيرمينا.

كل يوم وكل دقيقه فى حد بيسافر السما وبيفارقنا ويسبلنا عظه نستفيد بيها ويقولنا انه كان مستعد ياترى لما يجى علينا الدور حنكون مستعدين ولالسه بنفكر فى الاستعداد وهنعمل ذى العزارى الجاهلات ويغلق علينا الباب.

الموت هو الحقيقه الوحيدة اللي يومياً بيثبت ان الحياة ملهاش قيمه الموت هو افضل عظة للتوبة الموت رغم انه بيوجعنا على غيرنا بننسى تماما ان بكره هايوجع غيرنا علينا ساقية بتدور ومازال بيخطف الناس الحلوة اللي هاتوحشنا قعدتهم ولمتهم والكلام والضحك معاهم.

هايوحشنا حضنهم وسؤالهم وطبطبة ايديهم هايوحشنا اسمهم اللي بيظهر على الموبايل وابتسامتهم اللي بيقابلونا بيها.وبالرغم من كل الوجع فيه حتة نور بتقول ليس هو موت لعبيدك بل انتقال والمنتقليين مابيمتوش بيفضلوا عايشين في كل حتة فينا في كل مكان بنروحه بيحسوا جدا بينا وبيفرحوا بنجاحنا وبيحزنوا لتعبنا عزي يارب كل نفس بتتألم واملاها تعزية وفرح ويقين ان الاموات احياء في سماء لا تعرف الموت.