اختفاء يثير القلق في أسيوط.. أين الطبيب جورج سمير؟
اختفاء الطبيب جورج سمير يثير الرعب منذ 25 يومًا.. شقيقه بيتر يوجه نداء استغاثة: «مش عارفين نوصله.. هل ده طبيعي؟» | القصة الكاملة
حالة من الرعب والقلق تسيطر على أهالي محافظة أسيوط، وتحديدًا أسرة الطبيب جورج سمير، الذي اختفى في ظروف غامضة منذ 25 يومًا، دون الوصول لأي خيط واضح يكشف مصيره. منذ لحظة اختفائه وحتى اليوم، لم تنجح أجهزة الأمن في التوصل إلى أية معلومات، وهو ما دفع شقيقه، بيتر سمير، إلى توجيه نداء استغاثة عبر منصات التواصل الاجتماعي.
شقيق الطبيب جورج سمير: «مفيش أي خيط.. هل ده طبيعي؟»
نشر بيتر سمير، شقيق الطبيب المختفي، بوست مؤثر على صفحته الشخصية عبّر فيه عن ألم الأسرة وفقدان الأمل مع مرور الوقت، ووجه انتقادات لأجهزة الأمن التي لم تنجح حتى الآن في الوصول لأي دليل على اختفاء شقيقه، رغم جهود البحث والتحقيقات.
تفاصيل اختفاء الطبيب جورج سمير
بحسب ما ذكره شقيقه، فإن جورج سمير اختفى يوم كان يسير على طريق عام في وضح النهار، وسط المارة ووسائل المواصلات، ورصدته الكاميرات حتى وصل إلى مدخل سور كوبري قرية فزارة، ومن هناك اختفى تمامًا، دون أي أثر. وما زاد من الغموض، أنه لا توجد كاميرات مراقبة على الكوبري في ذلك الوقت، وتم تركيبها لاحقًا.
نص البوست الكامل من بيتر سمير
معلش بوست طويل شوية بس اختصرت على قد ما قدرت
٢٥ يوم عدو على اختفاء اخويا د/جورج ولحد انهارده موصلناش لاى خيط لأختفائه
لا مش احنا بس الى مش قادرين نوصل لأى حاجه
دا الشرطة والامن الوطنى بكل امكانياتهم لحد انهارده مش عارفين يوصلو لاى شىء برضو ؟؟!
طب انا المفروض اروح لمين تانى معلش ؟؟
بيقولو احنا عملنا كل اللى ممكن يتعمل ومشينا فى كل الطرق والاحتمالات اللى ممكن نلاقيه بيها بس مش قادرين نوصل لشىء محدد!!
طيب هل ده طبيعى !!!!
اذا كانت الشرطة والامن الوطنى مش قادرين يوصلو ل بنى ادم ناضج اختفى الساعة ١٢ الضهر على طريق عام مليان بالبشر وهو بيتمشى اومال مين اللى هيعرف يوصله ؟؟؟!!!
طيب سؤال
هل لو جورج ده كان مطلوب امنيا او على ذمة قضية والامن كان عاوز يجيبه وحب يستخبى من الامن فى اى مكان مكنش هيعرفو يجيبوه فى يومين تلاته ؟؟! اعتقد مستحيل
طيب احنا دلوقتى المفروض نعمل ايه ونروح لمين يدورلنا عليه تانى ! حد ممكن يفيدنا ؟!
برضو عشان نقول اللى لينا واللى علينا
الامن فعلا مقصرش عالاقل فى اول ١٠ ايام من الاختفاء فى البحث وكنا معاهم شبه يوميا يا اما فى مركز الشرطة او هما عندنا فى البيت.
وده اللى كنا نقصده فى مداخلاتنا مع قنوات وغيره
اغلب القرايب والاصحاب او اللى ليهم علاقة بجورج تم استجوابهم .
برضو من جهتنا التزمنا الصمت طول المدة دى عشان ميكنش فيه تأثير على مجرى التحقيق او التحريات وخيوط البحث والكلام ده وبرضو عشان هما ادرى بشغلهم ومن كتر ما تعبنا قولنالهم عاوزينه سواء حى او لاقدر الله ميت طيب نعمل ايه تانى ؟؟؟
لحد امتى المفروض افضل منتظر اى نتيجة منهم ؟!
صراحةً كون ان لحد انهارده وبعد المده دى ومحدش من الأجهزة الامنية عرف يوصل بس لمجرد خيط لأى شىء ف انا بعتبر ان ده فى حد ذاته فشششششل.
يعنى ايه راجل يطلع يتمشى على طريق عمومى الساعة ١٢ الضهر وطريق مليان بالناس وكل انواع وسائل المواصلات والكاميرات جابته ماشى من اول ما طلع من البيت لحد ما وصل عند مدخل سور كوبرى قرية فزارة وهناك اختفى عند الكوبرى ومش عارفين توصلو لاى شىء ده رعب حتى للرجالة الكبيره مش هقول للستات والاطفال!!
هو احنا مش المفروض عايشين فى بلد عالاقل مستقرة امنيا وليها اجهزتها الامنية اللى بتعرف دبة النملة والا كده نفرق ايه عن البلاد اللى حوالينا اللى الناس فيها بتقطع بعض ؟؟!
وطبعا لسوء الحظ مكنش فيه كاميرات على الكوبرى وتانى يوم من الحادثة ركبو كاميرات
وهنا ابتدينا ندخل متاهة الاحتمالات طب هيكون حصل ايه ؟!
كل الاحتمالات مشينا وراها
طيب لو وقع فى الميه سواء بارادته او لا هل مكنش هيظهر فى كل المده دى ؟؟!!
٢٥ يوم غير كافية لظهور جثمان غريق فى الميه اللى المفروض بيطلع بعد ٣ ايام فى الصيف ومثلا عالاقل ١٠-١٥ يوم فى الشتاء وعملنا اللى فى ايدينا من طرفنا جبنا غواصين وفتشو فى نفس مكان الاختفاء ولكن بلا فايدة.
طيب لو احتمالية خطف عشان فلوس محدش اتصل ليه لحد دلوقت ؟!
طيب احتمالية الخطف لهدف سرقة الاعضاء ؟
الله واعلم وكل شىء جايز فى البلد دى بصراحه مش مستبعد لكن
الشرطة استبعدت الموضوع ده تماما لان على حد قولهم مفيش حد عنده المكان والامكانيات والتجهيزات انه يقدر ياخد اعضاء من جسم انسان فى المناطق المحيطة ببلدنا وتفضل الاعضاء سليمة لحين زرعها بجسم تانى او حتى نقلها لاى مكان لاسباب طبية وصعوبة الموضوع بس الله اعلم برضو
طب هل لو طفش منعرفش نوصله اعتقد بعد اللى حاصل ومنتشر عن الموضوع صعب جدا حد يقدر يستخبى او ان حد يقدر يأويه عنده لانه هيتعرض للمسائلة القانونية.
طيب لو هو محتجز فى الامن الوطنى دى نقطة مش هقدر اجاوب عليها لانه اترد علينا بانه مفيش حاجه والله واعلم
يعنى راضيين بأى شىء ولكن كل شىء مجهول حوالينا والانتظار صعب جدا وان كنت انا اقدر اتحمل ده ف والدى ووالدتى مش بيقدرو
للاسف الموضوع بدا يهدا وينام والنتيجة صفر من اول يوم ف انا بتمنى ياريت الناس متوقفش شير والهاشتاجات لان ده كان له دور كبير فى الضغط والبحث بجدية فى اول ايام الاختفاء ولكن زيه زى اى موضوع فى بلدنا بياخد ضجة كبيره كالعادة وبعدين ينام ينام وشكرا.
شكرا لكل الناس المتعاطفة معنا وبتحاول تساعد باى طريقة
هل يتم كشف الغموض خلال أيام؟
وسط هذا الغموض، ينتظر الجميع من أجهزة الأمن ووزارة الداخلية توضيح الحقيقة، أو على الأقل التوصل لأي خيط يقود لاكتشاف مصير الطبيب جورج سمير. تظل القصة محط اهتمام الرأي العام، خاصة أن الاختفاء الغامض لطبيب شاب في وضح النهار على طريق عام بمصر، هو أمر غير معتاد ويثير التساؤلات.
- اختفاء الطبيب جورج سمير
- جورج سمير
- طبيب مختفي أسيوط
- بيتر سمير
- نداء استغاثة جورج سمير
- اختفاء طبيب في أسيوط
- اختفاء غامض
- جورج سمير كوبري فزارة
- أجهزة الأمن جورج سمير
- البحث عن جورج سمير