حقيقة عودة الدكتور جورج سمير بعد جل السوشيال ميديا - نادر شكري يرد علي انباء عودته ويكشف تفاصيل جديدة لموقع "الحق والضلال" ماذا حدث؟

انتشرت خلال الساعات الماضية على صفحات مواقع التواصل الاجتماعي أخبار تفيد بالعثور على الدكتور جورج سمير، طبيب الأسنان بالوحدة الصحية بالقوصية، بعد اختفائه لأكثر من شهر، حيث تداول رواد السوشيال ميديا منشورًا يشير إلى أنه تم العثور عليه بفضل جهود مكثفة من الأجهزة الأمنية، وأنه الآن في قبضة أمن أسيوط، مما جعل العديد من المتابعين يتفاعلون مع الخبر بالدعاء له بسلامة العودة إلى أسرته.

نفي رسمي من موقع "الحق والضلال"

في أول رد إعلامي على هذه الأنباء، نفى الصحفي نادر شكري، في تصريحات خاصة لموقع "الحق والضلال"، صحة ما يتم تداوله حول احتجاز الدكتور جورج سمير لدى الأجهزة الأمنية بمحافظة أسيوط، مؤكدًا أن هذه المعلومات غير دقيقة ولا تمت للحقيقة بصلة.

وأوضح نادر شكري أن الخبر الذي تم نشره عبر بعض الحسابات والمجموعات على السوشيال ميديا لا يستند إلى أي مصادر رسمية أو موثوقة، مشيرًا إلى أن الجهات المعنية لم تصدر أي بيان رسمي بشأن العثور على الطبيب المختفي، ولم يتم تأكيد هذه المعلومات من قبل أسرته أو الجهات الأمنية.

وعلى جانب آخر نشر بالأمس بيتر سمير أخو جورج

مساء الخير

انا مكنتش حابب اطلع كل شوية واكتب بوست الا للضرورة لكن للاسف فيه امور بتحصل وفيه إشاعات بتنتشر حوالينا ف انا مضطر انى اطلع و اكتب عنها بنفسى عشان عالاقل تكون فيها مصداقية من مصدر موثوق منه كوناً انى أخو جورج.

البوست طويل شوية وموجه اكتر للناس اللى متعرفناش كعائلة ومتعرفش جورج عالمستوى الشخصى لانى اللى شوفته فى التعليقات من الناس امبارح على الإشاعة كان يضايق امبارح كلنا سمعنا الاشاعة السخيفة اللى طلعت على جورج.

طيب نبدأ بمصدر الاشاعه واللى كانت عبارة عن بث مباشر لواحد من أحد النشطاء ملهوش اى صفة يتكلم بيها لكن بيقدم اى محتوى يثير بيه الجدل بين الناس وكل واحد من النشطاء دول بيكون له أهداف معينة مش بيعمل كده حباً فيك ولا خوفاً عليك .

وتابع: وبيكونو منتظرين اي حدث يحصل للمسيحيين على وجه الخصوص وللاسف ليهم دراويش بتثق فيهم وتدافع عنهم كمان 
طيب مين ده اصلا انا معرفش ؟؟
وايه موقعه من الاعراب برضو معرفش  ؟؟
وايه مصادره فى الكلام اللى بيقوله ده الله واعلم !!!! 
طيب مفيش حاجه واحدة معاه حتى طلعها يظهرها تثبت صحة أقواله للناس ؟! 
طيب اصدقك ازااااى؟؟ 
ليه فضلت حضرتك ساكت الفترة دى كلها متكلمتش ؟؟؟

الموضوع مكنش صدفة يا حضرات 
وأضاف :كل الحكاية الاخ ده اختلق القصة اللى قالها فى البث من بعد مداخلتى مع قناة الطريق و اخد الاخ ده جزء من كلامى فى المكالمه ودخله فىً قصة على مزاجه عشان يقفل بيها الموضوع زى ما هو حابب ويكون عمل سبق صحفى مش مهم على حساب مين بقى.

بالمناسبة لا يوجد عائلة بالاسم اللى ذكره الاخ ده فى البث بالقرية المذكورة.

وأضاف :الفكرة بقى انه فيه زى الاخ دا كتير وما بيصدقو اى حاجه تحصل عشان يطلعو يتكلمو ويألفو سيناريوهات من دماغهم وطبعا فيه صفحات لنشطاء زيه وقنوات للاسف بتساعدهم وتنشر كلامهم دون تحرى الدقة ومش محتاج اقول اسمائهم.

وتابع:و لو نلاحظ حاجة مشتركة بين النشطاء دول وهى ان كلهم مع القنوات والمنظمات اللى نشرت الاشاعه دى او غيرها فهو بيكون متواجد خارج مصر وعشان كده هو بيتكلم بكل أريحية لأنه ببساطة عارف انه مفيش حد هيعرف يحاسبه او يقاضيه ولا هتكون عليه مسائلة قانونية من اى حد او جهة ولو فيه واحد منهم متواجد فى مصر فهو لن يجرؤ انه يطلع يقول كلام زى ده وخلاص لانه عارف ايه اللى هيحصل معاه لو نشر اخبار زى كده بس هو ببساطة قاعد بيحكي وهو مرتاح بره مش فارق معاه اى شىء.

للأسف الشديد الناس ساعدت ان كلامهم ينتشر بدون تفكير فى الكلام اللى بيتقال حتى
كمان فيه بعض الصفحات و الجروبات المسيحية من داخل مصر بدات تشير منهم الاخبار اللى بيقولوها دون تحرى الدقة منها واللى للاسف بتكون بمثابة اخبار صحيحة وموثوق فيها لبعض الناس لمجرد انها صفحة مسيحية وده بيكون عالاقل لفئة معينة تفكيرها للاسف محدود وبسيط ومش بتفكر تشغل دماغها شوية وبتصدق ان الكلام صح لمجرد ان الكلام نازل على صفحة مسيحية .

وأضاف :رجاء رجاء من كل الناس تحرى الدقة و انها تفكر شوية فى اى حاجه تشوفها قبل ما تشيرها مش بس حتى فى موضوع جورج 
وانا مش عاتب على الناس اللى كتبت كومنتات مش لطيفة على الصفحات وصدقو بسرعة الاشاعه لان ببساطه لا يعرفونا ك عائلة ولا يعرفو جورج شخصيا عشان يحكمو على صحة الموضوع و بيصدقوا اى حاجه بتتقال لانهم ياما بيسمعو قصص عن امور تغيير الديانه والاسلمة والكلام اللى بيحصل على فترات فلما بيحصل حاجه مشابهه يصدقوها عمياني .

أما فيما يخص ان صفحة قناة الطريق اللى المفروض انها صفحة لقناة محترمة الناس بتثق فيها شوية عالاقل زى القنوات المسيحية اللى بتبث من مصر فأنا بمجرد وصول البوست من على صفحتهم طلبت منهم يشيلو البوست بعد التواصل مع الاستاذة نيفين اللى عملت معها مداخلة من يومين فطلبت منى بناء على طلب رئيس القناة انى اعمل فيديو او ڤويس انفى فيه الكلام ده عشان يشيلو البوست وعملت فويس وبعتهولها والفويس نزل لكن رجعت بلغتني ان رئيس القناة قال انه مش هيشيل البوست بتاع الاشاعه وانهم مجرد ناقل للخبر من صفحة احد النشطاء وان انا من حقى انفى الاشاعة وهم ينزلوه عادي.

طيب انتو كقناة كده بتساعدو فى نشر الاشاعات و عالاقل لما يكلمك مصدر موثوق وتتاكد ان الخبر اللي نزلته ده مش مظبوط ف تحترم مهنية شغلك وتشيل البوست المغلوط عشان الناس تثق فى كلامك بعدين لكن هما كان كل همهم  التفاعل اللى حصل ع البوست فطبعا خسارة انه يتمسح.

فهما كده ميفرقوش عن الصفحات اللى بيشيرو منها حاجه
وعليه لن يتم التواصل معهم مرة اخرى فى شىء او اى جهة خارج مصر فى العموم. 
اى خبر جديد حقيقى هيحصل هتعرفوه مننا و هكتبه هنا على حسابى سواء اخبار كويسه او لا عشان الناس متجريش ورا اى كلام وخلاص وتشير.

اما فيما يخص جورج والاشاعه اللى طلعت عليه ف انا مش لاقى تعليق مناسب للى حكاه الاخ ده فى بث اليوتيوب وبيحكى بثقة وكأن جورج ده شخص انا معرفوش أو غريب عنى مثلا و منعرفش حاجه عن حياته.

واختتم: دا اخويا الصغير واعرف كل حاجه عنه حتى لو خصوصيات واحنا كعائلة عارفين كويس دايرة علاقته سواء باصحابه او معارفه او غيره.

وكل الناس اللى تعرف جورج واللى ليها علاقة بيه عالمستوى الشخصي عارفه كويس انه لا يمكن يعمل حاجة زى اللى اتقالت دى.
شكرا لكل الناس اللى مكمله معانا وعندها من الوعى انها مش بتمشى ورا اى كلام وخلاص نكمل عادى فى نشر الهاشتاجات عشان الموضوع ميتنسيش لحين التدخل الالهى وربنا يتحنن علينا برجوعه