إسلام بحيري يفتح النـ ار على يوسف زيدان وخالد بسبب الإفتاء.. ماذا يحدث؟
شن إسلام بحيري هجوم كبير على التنويريين، وتحديدا خالد منتصر، ويوسف زيدان بسبب رفضهما قرار تحديد رؤية هلال شوال، وكتب منشور على صفحته الرسمية على الفيسبوك، ونوضحه لكم.
إسلام بحيري وحديثه عن التنويريين
كتب إسلام بحيري ردا على التنويريين ورفضهم قرار دار الإفتاء الآتي:
"هكتب في موضوع استطلاع الهلال وأمري لله
ولو سمحت اقرا بهدوء
لأن التنوير الحقيقي مش زياط واختلاف لمجرد الاختلاف
الموضوع عايز شرح أتمنى أعرف أوجزه
احنا بنصلي على توقيت محسوب بإيه ؟
الإجابة: محسوب بالشمس
شروق ومنتصف وزوال وغروب وليل وفجر
طيب ربنا أطلق على ده تسمية إيه في القرآن ؟
الإجابة: سماها أوقات
( إِنَّ ٱلصَّلَوٰةَ كَانَتۡ عَلَى ٱلۡمُؤۡمِنِینَ كِتَـٰبࣰا مَّوۡقُوتࣰا )
يبقى دي يا غالي مواقيت الشمس
إسلام بحيري يتساءل:
أكمل إسسلام بحيري حديثه بسؤال وجيه:
طيب سؤال
هل الشمس دي بتظهر وتزول وتغرب في إسنكدرية والجونة في وقت واحد ؟
الإجابة: لا في مواقيت مختلفة
وهنا بيختلف وقت الصلاة ما بين مدينتين في نفس البلد
طيب ليه منصليش في وقت واحد في مصر كلها ؟
الإجاب: لأن مواقيت ظهور الشمس في الأفق وغروبها مختلفة من مدينة للتانية
حلو
نخش على السؤال المهم
الشمس لما بتغرب في إسكندرية مثلا بتغرب في الأفق اللي ناس شايفاه ولا بالتلسكوب ؟
الإجابة: بتغرب في أفق نظرك انت
بمعنى لو ركبت طيارة فورا بعد ما صليت المغرب من مطار إسكتدرية هتشوف الشمس فوق لم تغرب
هل هتصلي المغرب تاني ؟
الإجابة: لا نهائي
ليه لا برغم إنك شايفها من الطيارة لم تغرب ؟
عشان انت ملكش غير الالتزام بالأفق اللي انت شايفه وحاسه وساكن جغرافيا فيه
مش أفق فوق السماء ولا أفق مدينة تانية
تمام كده ؟
تعالى بقى للهلال بتاع بداية الشهر
ربنا أطلق عليه نفس وصف اتباع ضوء الشمس في الصلاة
وقال في القرآن
( یَسۡـَٔلُونَكَ عَنِ ٱلۡأَهِلَّةِۖ قُلۡ هِیَ مَوَ ٰقِیتُ لِلنَّاسِ وَٱلۡحَجِّۗ )
يبقى ربنا سماها أيضا مواقيت زي الصلاة
وينطبق عليه قاعدة المواقيت لأنه معتمد على نفس الرؤية في نفس الأفق
وبالتالي
التزامك ببدء الشهر بالضبط زي مثال التزامك بأداء صلاة المغرب قبل ركوب الطيارة حسب غروبها في أفقك انت اللي انت شايفه
وليس بكل أفق في أي مدينة أو بلد بالعموم
إذن ميلاد الهلال فلكيا بالحسابات ليس معناه على الإطلاق إنه ظهر في الأفق الذي تعيش أنت فيه
مفهوم كده ؟
لأنه ممكن يولد حسابيا لكن لا يظهر في الأفق اللي انت شايفه أو عايش في منطقته
وده بالضبط زي غروب الشمس في إسكندرية وبعد طلوعك للطيارة في أفق أعلى تجدها لم تغرب
فالالتزام هنا هيكون باللي شفته في أفق إسنكدرية على الأرض
وده بالضبط نفسه الالتزام بالهلال لما يظهر في أفقك وليس حينما يولد فلكيا
الخلاصة:
لخص إسلام بحيري حديثه بسطور مختصرة وكتب نصا:
"فالخلاصة التنوير مش زيطة على أي حاجة
واللي عمله المفتي في مصر هو الصحيح
والدين هنا لا يضاد العلم إطلاقا
لأنه الموضوع هنا لا علاقة له بالعلم
الموضوع التزام شعوري بما تراه بعينك من ضوء الشمس والقمر والأفق والمكان الجغرافي المتواجد أنت فيه فقط
وملوش أي علاقة إنك تكون عالم في ناسا وعندك تلسكوب في البلكونه
وشكرا يا أصدقاء
