جورج رجع ولا مرجعش....نادر شكرى جاب من الاخر ويكشف الحقيقة كاملة وسر اختفاء الدكتور جورج سمير

انتشرت الكثير من الأقاويل خلال الساعات الأخيرة حول عودة الدكتور جورج سمير ولذلك خرج الصحفى المعروف فى الشئون القبطية نادر شكرى عن صمته ورد على تلك الإشاعات وايضا بيتر شقيق الدكتور جورج وبعض الصحافيين.

فكتب الصحفي نادر شكري:الحقيقة الوحيدة فى موضوع جورج سمير المختفي، أنه لا أحد يعرف أسباب اختفائه، وكيف اختفي، وأنه حتى الآن مازال مصيره مجهول، تحروا الدقة لأن ما ينشر دون دقة يضر مشاعر أسرته اللى مش بتعمل غير كل يوم تنفي أخبار غير دقيقة على السوشيال ميديا.

انا بكتب ده لاننا تعبنا من ما ينشر من  أخبار لا نعرف مصدرها، ولا تملك دلائل، وأنه أكيد جورج لو ظهر ، هيتم نشر ده بدقة ومن خلال أسرته.

نحن نتابع كل المصادر ونتقصى الحقائق ، ونصلي لأجله ونتواصل مع الجميع لدعم الأسرة فى محنتها ...نتمنى سرعة كشف مصيره، خاصة أن أجهزتنا الأمنية معروفة بقوتها فى كشف غموض اى جريمة .

وفى النهاية لا يمكن أن نؤكد أى قصة غير لو فى دلائل ..وده اللى شغالين عليه طول الوقت، وكل كلمة بتنشر يحب أن الدقة والمسئولية..

وانشالله جورج يظهر قريبا والكل يفرح..نصلي لأجله ..وشكر لاهتمام وتضامن الجميع مع أسرته...الصحفي نادر شكري

وكتبت الصحفية ماريانا مختار المنيا

حبايبي الغاليين نراعي شعور أسرة الدكتور جورج سمير و مش اي كلام نجري وراه ابنهم مختفي قرابة ٤٠ يوم ربنا يتولاهم 

نصبر على القصص لحد ما أهله هما اللي يقولوا حصل اية و فين و أمتي .

نفترض أن اللي اتقال حقيقي متزودش نار الأهل و ندوس عليهم ولو مش حقيقي متخليش الناس تبطل تدور و يقولك خلاص ما انت عارف مكانه الكلام اللي خرج من ناس معينه غير معقول وغير منطقي ربنا يظهر الحقيقة و أن شاء الله نعرفها كلنا.

وكتب بيتر سمير مساء الخير 

انا مكنتش حابب اطلع كل شوية واكتب بوست الا للضرورة لكن للاسف فيه امور بتحصل وفيه إشاعات بتنتشر حوالينا ف انا مضطر انى اطلع و اكتب عنها بنفسى عشان عالاقل تكون فيها مصداقية من مصدر موثوق منه كوناً انى أخو جورج. 

البوست طويل شوية وموجه اكتر للناس اللى متعرفناش كعائلة ومتعرفش جورج عالمستوى الشخصى لانى اللى شوفته فى التعليقات من الناس امبارح على الإشاعة كان يضايق امبارح كلنا سمعنا الاشاعة السخيفة اللى طلعت على جورج.

طيب نبدأ بمصدر الاشاعه واللى كانت عبارة عن بث مباشر لواحد من أحد النشطاء ملهوش اى صفة يتكلم بيها لكن بيقدم اى محتوى يثير بيه الجدل بين الناس وكل واحد من النشطاء دول بيكون له اهداف معينة مش بيعمل كده حباً فيك ولا خوفاً عليك وبيكونو منتظرين اى حدث يحصل للمسيحيين على وجه الخصوص وللاسف ليهم دراويش بتثق فيهم وتدافع عنهم كمان طيب مين ده اصلا انا معرفش ؟؟

وايه موقعه من الاعراب برضو معرفش  ؟؟

وايه مصادره فى الكلام اللى بيقوله ده الله واعلم !!!! 

طيب مفيش حاجه واحدة معاه حتى طلعها يظهرها تثبت صحة اقواله للناس ؟! 

طيب اصدقك ازااااى؟؟ 

ليه فضلت حضرتك ساكت الفترة دى كلها متكلمتش ؟؟؟

الموضوع مكنش صدفة يا حضرات 

كل الحكاية الاخ ده اختلق القصة اللى قالها فى البث من بعد مداخلتى مع قناة الطريق و اخد الاخ ده جزء من كلامى فى المكالمه ودخله فىً قصة على مزاجه عشان يقفل بيها الموضوع زى ما هو حابب ويكون عمل سبق صحفى مش مهم على حساب مين بقى.

بالمناسبة لا يوجد عائلة بالاسم اللى ذكره الاخ ده فى البث بالقرية المذكورة.

الفكرة بقى انه فيه زى الاخ دا كتير وما بيصدقو اى حاجه تحصل عشان يطلعو يتكلمو ويألفو سيناريوهات من دماغهم وطبعا فيه صفحات لنشطاء زيه وقنوات للاسف بتساعدهم وتنشر كلامهم دون تحرى الدقة ومش محتاج اقول اسمائهم.

و لو نلاحظ حاجة مشتركة بين النشطاء دول وهى ان كلهم مع القنوات والمنظمات اللى نشرت الاشاعه دى او غيرها فهو بيكون متواجد خارج مصر وعشان كده هو بيتكلم بكل أريحية لأنه ببساطه عارف انه مفيش حد هيعرف يحاسبه او يقاضيه ولا هتكون عليه مسائلة قانونية من اى حد او جهة ولو فيه واحد منهم متواجد فى مصر فهو لن يجرؤ انه يطلع يقول كلام زى ده وخلاص لانه عارف ايه اللى هيحصل معاه لو نشر اخبار زى كده بس هو ببساطة قاعد بيحكي وهو مرتاح بره مش فارق معاه اى شىء.

للأسف الشديد الناس ساعدت ان كلامهم ينتشر بدون تفكير فى الكلام اللى بيتقال حتى

كمان فيه بعض الصفحات و الجروبات المسيحية من داخل مصر بدأت تشير منهم الاخبار اللى بيقولوها دون تحرى الدقة منها واللى للاسف بتكون بمثابة اخبار صحيحة وموثوق فيها لبعض الناس لمجرد انها صفحة مسيحية وده بيكون عالاقل لفئة معينة تفكيرها للاسف محدود وبسيط ومش بتفكر تشغل دماغها شوية وبتصدق ان الكلام صح لمجرد ان الكلام نازل على صفحة مسيحية 

رجاء رجاء من كل الناس تحرى الدقة و انها تفكر شوية فى اى حاجه تشوفها قبل ما تشيرها مش بس حتى فى موضوع جورج 

وانا مش عاتب على الناس اللى كتبت كومنتات مش لطيفة على الصفحات وصدقو بسرعة الاشاعه لان ببساطه لا يعرفونا ك عائلة ولا يعرفو جورج شخصيا عشان يحكمو على صحة الموضوع وبيصدقو اى حاجه بتتقال لانهم ياما بيسمعو قصص عن امور تغيير الديانه والاسلمة والكلام اللى بيحصل على فترات فلما بيحصل حاجه مشابه بيصدقوها عميانى 

اما فيما يخص ان صفحة قناة الطريق اللى المفروض انها صفحة لقناة محترمة الناس بتثق فيها شوية عالاقل زى القنوات المسيحية اللى بتبث من مصر فا انا بمجرد وصول البوست من على صفحتهم طلبت منهم يشيلو البوست بعد التواصل مع الاستاذة نيفين اللى عملت معها مداخلة من يومين فطلبت منى بناء على طلب رئيس القناة انى اعمل فيديو او ڤويس انفى فيه الكلام ده عشان يشيلو البوست وعملت فويس وبعتهولها والفويس نزل لكن رجعت بلغتني ان رئيس القناة قال انه مش هيشيل البوست بتاع الاشاعه وانهم مجرد ناقل للخبر من صفحة احد النشطاء وان انا من حقى انفى الاشاعه وهم ينزلوه عادي.

طيب انتو كقناة كده بتساعدو فى نشر الاشاعات وعالاقل لما يكلمك مصدر موثوق وتتاكد ان الخبر اللى نزلته ده مش مظبوط ف تحترم مهنية شغلك وتشيل البوست المغلوط عشان الناس تثق فى كلامك بعدين لكن هما كان كل همهم  التفاعل اللى حصل عالبوست فطبعا خسارة انه يتمسح  فهما كده مفرقوش عن الصفحات اللى بيشيرو منها حاجه وعليه لن يتم التواصل معهم مرة اخرى فى شىء او اى جهة خارج مصر فى العموم. 

اى خبر جديد حقيقى هيحصل هتعرفوه مننا و هكتبه هنا على حسابى سواء اخبار كويسه او لا عشان الناس متجريش ورا اى كلام وخلاص وتشير.

اما فيما يخص جورج والاشاعه اللى طلعت عليه ف انا مش لاقى تعليق مناسب للى حكاه الاخ ده فى بث اليوتيوب وبيحكى بثقة وكأن جورج ده شخص انا معرفوش او غريب عنى مثلا ومنعرفش حاجه عن حياته.

دا اخويا الصغير واعرف كل حاجه عنه حتى لو خصوصيات واحنا كعائلة عارفين كويس دايرة علاقته سواء باصحابه او معارفه او غيره. 

وكل الناس اللى تعرف جورج واللى ليها علاقة بيه عالمستوى الشخصى عارفه كويس انه لا يمكن يعمل حاجة زى اللى اتقالت دى.

شكرا لكل الناس اللى مكمله معانا وعندها من الوعى انها مش بتمشى ورا اى كلام وخلاص نكمل عادى فى نشر الهاشتاجات عشان الموضوع ميتنسيش لحين التدخل الالهى وربنا يتحنن علينا برجوعه .